Gele Flott

De Gele Flott weer en Grupp vun 15 Scheep, de acht Johr lang in’n Groten Bittersee un in’n Timsah-See fungen weer. Den Naam hett de Flott vun de gele Farv vun’n Wööstensand, de sik mit de Tied op de Scheep sammeln dee.

De 15 Scheep weren an’n 8. Juni 1967, to de Tied vun’n Söss-Daag-Krieg, jüst op’n Weg dör’n Sueskanal, as de Israelis bi dat Över vun’n Kanal anlangt sünd un de beiden Utgäng vun’n Kanal dicht maakt hebbt. De Scheep kunnen nich mehr rut ut’n Kanal. De Scheep hebbt sik denn in’n Groten Bittersee sammelt, wo noog Platz för de Scheep weer. Blot een Schipp is in’n lüttjern Timsah-See bleven. De Scheep weren:

• MS Nordwind (West-Düütschland)
• MS Münsterland (West-Düütschland)
• MS Killara (Sweden)
• MS Nippon (Sweden)
• MS Essayons, ex Sindh (Norwegen)
• MS Agapenor (Grootbritannien)
• MS Melampus (Grootbritannien)
• MS Scottish Star (Grootbritannien)
• MS Port Invercargill (Grootbritannien)
• SS African Glen (USA)
• MS Djakarta (Polen)
• MS Boleslaw Bierut (Polen)
• MS Vassil Levsky (Bulgarien)
• MS Lednice (Tschechoslowakei)

In’n Timsah-See leeg de Observer (USA).

En Enn vun de Situation weer nich aftosehn. In’n Oktober 1967 hebbt sik denn de Krus vun de 14 Scheep op de Melampus drapen un dor de Groot-Bittersee-Sellschop grünnt, mit de se sik gegensiedige Hülp toseggt hebbt. De Observer weer nich Deel vun disse Sellschop. De Krus hebbt sik denn op jemehr Scheep inricht. Se hebbt sik mit de annern Krus drapen un to de Olympschen Spelen 1968 in Mexiko-Stadt de Olympschen Spelen vun’n Bittersee afhollen. Vun besünner Intress för Breefmarkensammlers sünd nu noch de Bordmarken, de de Krus sülvst entworfen hebbt. 1969 hebbt se de Scheep in Gruppen tohoopleggt, dat dat eenfacher weer, de Scheep flott to hollen, un dat se mit weniger Lüüd utkemen. En Deel vun de Krus is denn Nahuus kamen. Eerst in’t Vörjohr 1975 hebbt de Israelis den Kanal wedder freegeven un de beiden düütschen Scheep sünd an’n 24. Mai 1975 in’n Haven vun Hamborg ankamen. 30.000 Lüüd harrn sik dor versammelt de beiden Scheep to begröten. Na acht Johr, dree Maand un fief Daag wedder de Australien-Reis vun de Münsterland nu endlich toenn. De beiden düütschen Scheep weren de beiden eenzigen, de to de Tied noch ut egene Kraft föhren kunnen.

Literatur

• Hans Jürgen Witthöft: Acht Jahre gefangen im Großen Bittersee, ProMar, Hamburg 2015, ISBN 978-3-00-051599-6.

Weblinks

• Wolfgang Scharrnbeck: Gefangen im Suez Kanal. In: Spiegel Online. 17. Mai 2008, afropen an’n 6. April 2015. 
• Peter Kiehlmann: Bilder der Nordwind. Deutsche Dampfschifffahrts-Gesellschaft „HANSA“, 11. Dezember 2009, afropen an’n 6. April 2015. 
• Bjoern Moritz: Post vom Großen Bittersee! In: Seemotive – Motiv-Philatelie rund um die Seefahrt. 13. Mai 2011, afropen an’n 6. April 2015.