Gemeen (Belgien)

In Belgien sünd de 10 Provinzen un de Hööftstadtregion in Gemenen opdeelt. Vun de gifft dat 589 Stück. Elk Gemeen hett Statistik Belgien en egen Gemeenslötel tokennt.

Grenzen vun de Gemenen in Belgien

In Gemenen mit mehr as 100.000 Inwahners kann de Gemeen noch wedder lütter opdeelt wesen, in Stadtdelen, de denn en egen Raat un en egen Verwalten hebbt. Aktuell gifft dat disse Stadtdelen blot in Antwarp (9 Stück).

Historie

1795 sünd de Gemenen toeerst offiziell fastleggt worrn. Gemenen, de weniger as 5000 Inwahners harrn, sünd to Kantongemenen tohoopleggt worrn. Man al 1800 hebbt se disse Grootgemenen wedder oplööst. Dat geev don 2776 Gemenen in Belgien. 1839 müss Belgien 124 Gemenen an de Nedderlannen afgeven un vun 119 annere Gemenen is do dat Groothertogdom Luxemborg worrn. 1920 kemen noch mal welk Gemenen dorto, as Düütschland de Oostkantons an Belgien afgeven müss. 1961 keem denn dat Eenheitsgesett. Dat Gesett dee fastleggen, dat Gemenen ut verscheden Grünn tohoop leggt warrn kunnen. 1964, 1969 un 1970 geev dat dorvun Reformen un de Tall sünk vun 2663 op 2359. 1971 dee Binnenminister Lucien Harmegnies dat Eenheitsgesett utwieden un 1975 hett sien Opfolger Joseph Michel dat Gesett för de Gemeenreform dörbröcht. An’n 1. Januar 1977 keem de grote Reform, mit de de Tall vun Gemenen op 596 dalgüng. In Antwarp duer dat noch en beten, dat de Reform dor ok vull gellen dee. Eerst an’n 1. Januar 1983 kemen söven Gemenen ut dat Ümland vun Antwarp to de Gemeen. Dat weer dat letzte Maal, dat sik an de Gemenen wat ännern dee.

Siet 2000 sett mit dat Lambermont-Övereenkamen nich mehr de Staat de Gesetten för de Gemenen fast, man de Regionen. Dorvun sünd de Regeln in de fläämsche, de walloonsche un de Hööftstadtregion middewiels in de Details al en beten verscheden.