Hauptmenü öffnen

Georg von der Vring (* 30. Dezember 1889 in Braak, † 1. März 1968 in München) weer en Schoolmester, Dichter un Maler.

He weer de Söhn von enen Seemann in Braak (Brake). He besoch von 1904 bit 1910 dat Lehrerseminar in Ollnborg. Al in disse Tiet schreef he Gedichten för ene Zeitung. Na siene Seminarutbildung weer he twee Jahr as Schoolmester in Horumersiel. Von 1912 bis 1914 studeerde he wieter an de Kunstschool in Berlin. Dar keem 1913 sien eerste Gedichtband mit dartig lyrische Gedichten herut.

In’n Eersten Weltkrieg weer Vring Kumpenieföhrer un keem verwunnst in amerikaansche Gefangenschup. Von 1919 bit 1928 weer he Tekenlehrer in Jever. In de Tiet geef he den Gedichtband „Südergast“ herut. In Jever entstund ok de Roman „Soldat Suhren“. An den Titel is al to sehn, dat he darin veel von sik sülfst schreef. Siene Moder weer ene geboorne Suhren (Albertine Suhren). Sien Fründ weer de Verleger Peter Suhrkamp. To sien Tiet in Jever weer en vun sien Schölers Hein Bredendiek.

„Soldat Suhren“ is woll de eerste Antikriegsromaan, denn he keem noch herut vör Remarques „Im Westen nichts Neues“. 1928 geef von der Vring de Tekenlehrerstäe an dat Jeversche Gymnasium up, denn sien Romaan weer so goot ankamen, dat he sik dat leisten kunn, as freen Schriever wieter to maken.

Neven siene Schrieveree maalde he tachentig Öölbiller, dreehunnert Aquarelle un an de dusend Teeknungen. 1930 toog he na Stuttgart un 1947 na München. Mit de Nazis harr he nix gemeen. Dat harr he all in Jever unner Bewies stellt un dat weer woll ok de Grund wesen, dat he dar nich so recht ankamen weer.

In sien Romaan „Die Wege tausendundeins“ keek he noch eenmaal up siene Jöögd in Ollnborg un Berlin torüch. Midde de sesstiger Jahren woor he swaar krank. Em drauhde blind to weern. In sienen Verdreet nehm he sik an’n 1. März 1968 dat Leven.