Glen Ord is en Whisky-Brenneree bi Muir of Ord op dat Halfeiland Black Isle, Ross-shire, Schottland.

Glen Ord

Brenneree Glen Ord (Foto: Andrew Wood)

Land Schottland
Region Highlands
Tyyp Malt
Status aktiv
Besitter Diageo
Grünnt 1838
Grünner Robert Johnstone, Donald McLennan
Waterborn Loch nam Bonnach, Loch nan Euan[1]
Washstill(s) 3 × 18.000 l
Spiritstill(s) 3 × 15.500 l
Produkschoonsvolumen 5.000.000 l[2]

Historie ännern

 
De Molteree, de to Glen Ord höört (Foto: David Greenhalgh)

De destille is 1838 vun Robert Johnstone un Donald McLennan grünnt worrn. 1947 müss sik Robert Johnstone ut dat Gewarf torüchtehn, 1955 güng de Brenneree an Alexander McLennan un Thomas McGregor. Na den Dood vun Alexander McLennan in’t Johr 1870 hett 1877 Alexander MacKenzie, de ne’e Ehmann vun McLennan sien Weetfro, de Brenneree övernahmen, bit se 1896 an James Watson & Son verköfft worrn is. De Brenneree is nu renoveert worrn un kreeg ok gröttere Moltboddens. Vun 1917 bit 1919 weer de Destille stillleggt. 1923 weer se an Thomas Dewar verköfft un güng 1925 an de Distillers Company Limited (DCL). Vun 1939 bit 1945 is de Brenneree wedder dichtmaakt wesen.

Vun 1958 bit 1966 weer bi Glen Ord en Reeg vun Experimenten maakt üm fasttostellen, wat dat in’n Smack wat utmaken deit, wenn de Brennblasen ünnerscheedlich hitt maakt warrt (Kahl, Ööl, Damp). Twee vun de Brennblasen weern op direkt Ööl-Füür ümstellt, de annern beiden bleven bi direklt Kahl-Füür. 1960 weern de mit Ööl anfüürten Brennblasen op Damp ümstellt. 1961 sünd de Tennmolteree (Floor Maltings) dicht maakt un de Kastenmoltanlagen (Saladin Boxes) inboet. In’t Johr 1966 weer de Tall vun de Brennblasen op söss vergröttert[2] un se all weern op Damp-Füür ümstellt.

1968 weer op dat Land vun de Destille en grote Trummelmolteree (Drum Maltings) inricht, wobi de Brenneree ehr egen Molt sülvst noch bit 1983 ut de Kastenmoltanlaag vun 1961 betogen hett[1][2]. 1985 is de Brenneree an de United Distillers gahn un dormit opletzt an Diageo.

En Tiet lang is de Whisky ok as Glen Oran, Ord, Ordie oder Glenordie verköfft worrn. Originalaffüllen ünner disse Naams sünd intwüschen bannig roor.

Produkschoon ännern

 
Whiskyfatten vun Glen Ord

Glen Ord höört to dat schottische Whiskyrebeet Highlands. Dat Water för de Produkschoon stammt ut den Loch nam Bonnach un den Loch nam Euan. In de Destille gifft dat en Meeschfatt (mash tun) vun 12,5 t as ok teihn Gäärfatten (wash backs)[2]. Brennt warrt in dree wash stills to 18.000 l un dree spirit stills vun 15.500 l, de mit Damp hitt maakt warrt. De Molteree, de 1968 boet worrn is, versorgt en grote Tall vun schottische Destillen.

Kiek ok ännern

Literatur ännern

  • Charles MacLean (Rutgever): Whisky. World Guide, Regions, Distillers, Malts, Blends, Tasting Notes. Dorling Kindersley, London et al. 2008, ISBN 978-0-7566-3349-3.
  • Walter Schobert: Das Whiskylexikon. Fischer Taschenbuch Verlag, Frankfort an’n Main 2003, ISBN 978-3-596-15868-3.

Borns ännern

  1. a b Misako Udo: The Scottish Whisky Distilleries. Black & White Publishing, Edinburgh 2006, ISBN 1-845-021304.
  2. a b c d Ingvar Ronde: Malt Whisky Yearbook 2013. Mag Dig Media, Shrewsbury 2012, ISBN 978-0-9552607-9-7, S. 146.

Weblenken ännern

  Glen Ord. Mehr Biller, Videos oder Audiodateien to’t Thema gifft dat bi Wikimedia Commons.


Koordinaten:57° 31′ N, 4° 29′ W