Godiva

Godiva (oder Godgifu, † üm un bi 1080) weer ene Aadlige bi de Angelsassen ut dat 11. Johrhunnert. Se is dor bekannt för, dat se naakend dör de Stadt Coventry reden is, dat ehr Mann, de Graaf, vun de Stüern nalaten schull.

Lady Godiva von John Collier, üm un bi 1898

Godiva-Statue in Coventry

Leven

1043 hebbt Leofric, de Graaf vun Mercia un siene Fro Godiva de Benediktinerabtei in Coventry stift un ehr rieken Besitt togeven.

De Legenn, de vun dat 13. Johrhunnert nawiest is, seggt:

Dat ehr Mann, de Graaf Leofric, vun de Stüern nalaten schull, de de Lüüd vun Coventry betahlen müssen, is Godiva naakt dör de Stadt reden, blot bedeckt vun ehr lang Hoor. Leofric, de vun dissen Mood beindruckt weer, hett denn gor kene Stüern mehr feddert, man afsehn vun de op Peer.

Wat dor later vun maakt worrn is

Vun 1678 af an hebbt de Lüüd in Coventry elk Johr den Ridd vun Godiva dör en Ümtog fiert.

In dat 17. Johrhunnert is de Geschicht noch wedder en beten utsmückt worrn: Se güng nu so, dat blot een Minsch (Peeping Tom, Luuscher-Tom) sik troot hett, de naakte Godiva antokieken un dor vun blind worrn is.

Alfred Tennyson hett 1842 en Gedicht över ehr schreven. Dat gifft ok welk Biller mit dat Motiv, ünner annern vun John Collier (1898) un vun Salvador Dalí (1971).