Good Nückel
Dat Good Nückel (hoochdüütsch Gut Nückel) weer en Eddelgood in dat Dörp Nückel (vondaag Gemeen Lox in’n Landkreis Cuxhoben, Neddersassen).
.jpg)
_.jpg)
Historie ännern
Dat Good Nückel kummt 1139 as Nucla toeerst in de Oorkunnen vör.[1] Ut en Oorkunn von 1346 weet wi, dat dat Good in düsse Tied en Knappen Engelbert von Rode tohöört hett, de sien Swager, den Greev von Stotel, toseggt, dat he op sien Slott Nückel keen Bargfreed boot.[1]
1586 hebbt Detlev von der Hude un Cassen von Brobargen dat Good köfft un twüschen sik opdeelt.[1] De ole Borg weer do al verfullen un dorüm hebbt sik von der Hude un von Brobargen egene, ne’e Goodshüüs boot.[1]
Detlev von der Hude hett sien Goodshuus 1586 boot un Cassen von Brobargen 1616.[1] Na korte Tied hett Claus Bernhard Quiter dat brobargensche Good köfft un al 1621 wedder verköfft an Parm Drewes.[1] 1625 hett dat denn Jacob Tengnagel köfft.[1] Von em hett dat Good Maria von Roon, borene Cabliau, övernahmen, de ut Holland stammen dee.[1] Na ehren Dood hett en Armenhuus in Amsterdam dat Good arvt, dat dat Good denn aver in en Aukschoon verköfft hett.[1] De Köper weer 1689 de Landraad Christoph von Lütcken.[1] Von Lütcken hett later tosätzlich ok dat Good köfft, dat de Familie von der Hude tohöört harr.[1] Dormit weer dat Good wedder in een Hand vereent.[1] Dat Goodshuus, dat Cassen von Brobargen 1616 boot harr, hett noch bet 1957 stahn un is denn afreten worrn.[1] Dat weer en Neddersassenhuus.[1]
Dat Goodshuus von Detlev von der Hude weer 30×12 m groot un ok en Neddersassenhuus.[1] De Schuppen un de Törfschüün, de ok ut dat 16. Johrhunnert weren, sünd 1920 afreten worrn.[1] Dat Goodshuus von 1586 sülvs hebbt se 1967 afreten.[1]
Dat Öller von’n Meierhoff is nich genau bekannt.[1] Aver ok düt Neddersassenhuus is temlich oold. Dat weer 24,8×10,8 m groot un hett 1920 en Anbo kregen.[1] In dat Meierhuus hett över 200 Johr lang de Familie Grimm leevt.[1] De Meierhoff is 1987 afreten worrn.[1]
Dat Arbeiderhuus von dat Good is üm 1630 boot worrn.[1] Dat weer en 26×12 m groot Neddersassenhuus un is 1962 afreten worrn.[1] De Törfschüün to dat Arbeiderhuus hebbt se 1957 afreten.[1]
In dat 17. Johrhunnert hett Christoph von Lütcken dat Good köfft un dor 1690 en Jagdslott boot.[1]
Na en Brand 1899 sünd Delen von de olen Gebüüd afreten worrn un 1900 is dat Goodshuus as Gast- un Forsthuus nee inwieht worrn.[1]
Na’n Eersten Weltkrieg hett Hugo Stinnes dat Good köfft un den Fokus wedder op de Bueree leggt. De Familie Grimm is na Hogeworth wegtagen.[1] Stinnes hett Gösta Hansson as Goodsverwalter insett. Na’n Tweten Weltkrieg is Stinnes sien Kunzern oplööst worrn un dat Good güng 1953 an de Hannöversche Siedlungssellschop. Hansson is Verwalter bleven, aver de Sellschop hett dat Good opdeelt un 1960 denn kumplett oplööst. Dat Land von dat Good is an söss Buurn gahn, de so ut dat Dörp Bexhöv utsiedeln kunnen.
Verwaltungsgeschicht ännern
Dat Good hett vör 1851 to’n Bezirk von dat Borggericht Oolluunbarg in de Huusvaagdie Oolluunbarg von dat Gericht Beverst tohöört un denn von 1851 bet 1859 to dat Amt Beverst. Von 1859 bet 1885 weer de Oort in dat Amt Leh un na 1885 in’n Kreis Geestmünn. 1932 is dat Deel von’n Kreis Wersermünn worrn.
Dat Dörp Nückel weer fröher en egenstännige Gemeen, is aver 1929 Deel von de Gemeen Bexhöv worrn.
Inwahnertall ännern
| Johr | Inwahners |
|---|---|
| 1848[2] | 6 Lüüd, 1 Huus |
Religion ännern
Dat Good weer evangeelsch-luthersch präägt un hett to dat Kaspel von de Johannes-de-Döper-Kark in Bexhöv höört.
Footnoten ännern
- ↑ a b c d e f g h i j k l m n o p q r s t u v w x y z aa Peter Raap: Das untergegangene Dorf Nückel. Historische Gebäude wurden zu Feuerholz verarbeitet. Niederdeutsches Heimatblatt 764 (August 2013). PDF-Datei
- ↑ Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 149
Koordinaten:53° 30′ N, 8° 40′ O