Gorseth Kernow
De Gorseth Kernow is en koornsche Organisatschoon, de den keltschen Charakter vun Cornwall bewohren will.
De koornsche Gorseth is 1928 vun den Arzdruiden Pedrog of Wales na dat Vörbild vun den waliesschen Gorsedd wedder opricht worrn as en lütte Grupp vun koornschen Gelehrten em dorüm fraagt hett. Mang jüm weern Henry Jenner and Robert Morton Nance.
De Gorseth Kernow ünnerstütt dat Wedderopleven vun de koornsche Spraak un föddert ok dat Studium vun Kunst un Geschicht. De Gorseth versteiht sik nich as politsche Organisatschoon.
De eerste Zeremonie weer 1928 bi den Steenkrink vun Boscawen-Un. Siet disse Tiet hett dat elk Johr so en Drepen geven un de Gorseth is en wichige Instituschoon vun't kulturelle Leven in Cornwall warrn un de Medien bericht veel dorvun.
En wichtigen Deel vun den Gorseth is, dat se Lüüd as Bard opnehmt, de sik üm de koornsche Kultur verdeent maakt hebbt. Bardschoppen gifft dat t.B. för dat Studium vun de koornsche Spraak, för koornsche Musik, för dat Fördern vun Kunst (besünners mang de Kinners) un ok vör vele annere Saken. Niege Barden kriggt vun den böversten Barden en bardschen Naam. De Naams sünd op koornsch un hebbt faken wat mit den Grund vun de Bardschop to doon.