Gröön

Gröön heet de Klöör vun dat Licht, wat ene Bülgenläng twüschen 520 und 565 nm hett. De Farvindruck Gröön kann dör dat Vermengeleern vun Farven tostann kamen, wenn een Geel un Blau tohopendeit.

Gröön

Wieldat in vele Planten Chlorophyll gifft, is Gröön en Klöör, de in de Natur faken vörkummt. Wenn mit den Harvst de Tiet vun dat Wassen för de Planten üm is, denn warrt de Andeel vun dat Chlorophyll ringer un gele un rode Farvstoffen kaamt Vortüüg.

Klöörlehr

De Klöör Gröön

• is ene vun de Grundklören vun dat Additive Mischen vun Farven (as ok Root un Blau)

• kümmt tostann dör dat Mischen vun de Farven Geel un Cyan in’t Subtraktive Mischen vun Farven

• is de Komplementärklöör to Magenta

• hett in’n RGB-Farvruum den Wert RGB = (0, 255, 0) dezimal oder 00FF00 hexadezimal.

Bedüden

Bi de Klöör Gröön denkt de Minschen an lebennig ween, Leven un Wassen. In de Natur is Gröön sünners in’t Vörjohr präsent, wenn dat mit dat nee Wassen wedder losgeiht. Gröön is de Klöör vun de Frische un de Natürlichkeit. Gröön kann een ok ansehn as Klöör vun dat Höpen un vun de Toversicht.

De Klöör gröön warrt faken bruukt, üm to wiesen, wat verlööft is un wat funkschoneeren deit. En gröön Ampel wiest, dat een nu fudder fohren kann. Wenn en losleggen dröff, warrt seggt, he hett „gröönet Licht“ kregen.

Man ok wenn wat noch nich riep is, is dat gröön. En grönen Appel oder en gröne Banaan mutt noch en beten töven. Just so is dat mit en Minschen, de noch „gröön (achter de Ohren)“ is. Wenn wat ümsett weern schall, wat keen Sinn un Verstand hett, denn seggt een woll ok: „Dat is woll bi’n grönen Disch rutsuurt“.

In’n Islam is Gröön ene hillige Klöör. In de Flaggen vun vele islaamschen Staaten gifft dat de Farv Gröön. Op de Insel Irland steiht Gröön för Katholizismus un för dat Höpen: Bi den St. Patrick’s Day is allens gröön smückt.

De Farv Gröön harr in’t Middelöller dat Bedüden vun ene Lewe, de just begunnen hett. Dor kümmt „de gröne Siet“ un - as Gegensatz - de Snack „en Minschen nich gröön wesen“ vun af. Dat öllste Schriftstück, wat dorvun snackt, is en Passion över de hillige Katharina ut’t Middelöller, wo dat vun de Lüüd, de gegen se weern, heet: „Was gegen ir vil ungrune“.

En Gröön, wat ähnelk to’t Geel is, warrt giftig nöömt. (giftgröön).