Höhl von Movile
De Höhl von Movile is en Höhl in Rumänien bi Movile, de 1986 opdeckt worrn is un vörher opminnst 500.000 Johr ganz von de Ümwelt afslaten weer.
De Höhl is blot 12.000 m² groot un de hööchste Punkt reckt bet 18 m ünner de Böverflach. De deepste Punkt liggt bi so 24,5 m ünner de Böverflach. Dat Water is narms deper as twee Meter. Alltohoop is se so bi 300 m lang. Blangen den Höövdruum gifft dat noch twee afslatene Luftblasen.
De Höhl harr sik al vör 5 Millionen Johr billt un is sied opminnst 500.000 Johr kumplett von de Ümwelt afslaten. In disse Tied hett sik en Atmosphäär billt, de to’n groten Deel op Swevel baseert un de blot ringe Andelen von Suurstoff hett. Se hett 7–10 % Suurstoff (21 % in uns Atmosphäär), 2–3,5 % Kohlendoxid un 1–2 % Methan[1]. De Wannen von de Karsthöhl bestaht ut Lehm, de von 25 Meter Kalksteen ümgeven is. De Höhl tuuscht sik mit de Ümwelt blot över en Waterader ut, de ut en Deepd von 400 Meter opstiggt.
De Höhl is in’n Juli 1986 von Cristian Lascu opdeckt worrn, as se den Ünnergrund wegen en Boprojekt in de Gegend ünnersöcht hebbt. Aver eerst 1990 hebbt se richtig anfungen, de Höhl neger to ünnersöken.
Ökosystem
ännernIn de Höhl hett sik en ganz egen Ökosystem utbillt. 46 Oorden kaamt in de Höhl vör, von de 33 blot hier un narms anners to finnen sünd (endemische Oorden). Basis von dat Ökosystem sünd Swevelbakterien, de en Oort Glidder op dat Water billt, op den Schimmel wasst, de denn von anner Levewesen freten warrt. Dat is dormit dat eenzige Ökosystem op de Welt, dat kumplett ahn Photosynthees utkummt un blot Chemosynthees hett.
Nadem de Höhl von de Ümwelt afslaten weer, hebbt sik de nu fungenen Deerten an de ne’e Ümgegend anpasst (Troglomorphie). To’n Bispeel hebbt se in’n Loop von de Tied all Pigment verloren, hebbt jemehr Ogen trüchbillt un de annern Sinn verbetert un hebbt sik so anpasst, dat se sik kumplett von Schimmel un Bakterien nehrt, de wedder von dat Sulfid ut dat Höhlenwater jemehr Energie treckt.
Oorden, de op’t Land leevt:
- Allolobophora sp. (Regenworm)
- Caucasonethes n.sp. (Assel, endemisch)
- Haplophtalmus n.sp. (Assel, endemisch)
- Trachelipus troglobius (Assel, endemisch)
- Armadillidium tabacarui (Assel, endemisch)
- Chthonius monicae (Spinn, endemisch)
- Roncus dragobete (Spinn, endemisch)
- Roncus ciobanmos (Spinn, endemisch)
- Marianana mihaili (Spinn, endemisch)
- Lepthyphantes constantinescui (Spinn, endemisch)
- Agraecina cristiani (Spinn, endemisch)
- Nesticus n.sp. (Spinn, endemisch)
- Hahnia caeca (Spinn, endemisch)
- Labidostoma motasi (Miet, endemisch)
- Geophilus sp. cfr. insculptus (Eerdassel)
- Clinopodes trebevicensis (Eerdassel)
- Cryptops anomalans (Hunnertbeen)
- Symphynella sp. (Hunnertbeen)
- Archiboreoiulus n.sp. (Dusendbeen, endemisch)
- Onychiurus movilae (Springsteert, endemisch)
- Heteromurus cfr. nitidus(Springsteert)
- Onchopodura vioreli (Springsteert, endemisch)
- Plusiocampa isterina (Dubbelsteert, endemisch)
- Plusiocampa euxina (Dubbelsteert, endemisch)
- Medon dobrogicus (Sever, endemisch)
- Tychobythinus n.sp. (Sever, endemisch)
- Decumarellus sarbui (Sever, endemisch)
- Clivina subterranea (Sever, endemisch)
Oorden, de in’t Water leevt:
- Dendrocoelum sp. (Worm)
- Protorhabditis n.sp. (Fadenworm, endemisch)
- Panagrolaimus n.sp. (Fadenworm, endemisch)
- Chronogaster troglodytes (Fadenworm, endemisch)
- Habrotrocha rosa (Räderdeert)
- Habrotrocha bidens (Räderdeert)
- Haemopis caeca (Egel, endemisch)
- Aeolosoma hyalinum (Worm)
- Aeolosoma litorale (Worm)
- Heleobia dobrogica (Watersnigg, endemisch)
- Pseudocandona sp. cfr. eremita (lütt Kreeft, endemisch)
- Eucyclops subterraneus scythicus (Roderfootkreeft, endemisch)
- Tropocyclops prasinus (Roderfootkreeft)
- Parapseudoleptomesochra italica (Roderfootkreeft)
- Niphargus sp. cfr. stygius (Krabb, endemisch)
- Pontoniphargus racovitzai (Krabb, endemisch)
- Asellus aquaticus infernus (Waterassel, endemisch)
- Nepa anophthalma (Waterskorpion, endemisch)