Hanne Haller

Hanne Haller (* 14. Januar 1950 in Rendsborg; † 15. November 2005 in Tegernsee; börgerlich Hannelore Haller) weer en düütsche Slagersingersche, Komponistin, Ledermakersche, Produzentin un Toonmeestersche.

Hanne Haller, 1990

Levensloop

Hanne Haller is in Sleswig-Holsteen opwassen. Ehr Mudder weer en Opernsingersche, ehr Vadder Bankkoopmann. Wiel ehr Schooltiet hett se af 1965 in Ronnenberg bi Hannober in de Musikgrupp The Rooks („De Nevelkreihn“) Slagtüüch speelt. Na de School füng se 1968 en Sportstudium an, müss dat aver wegen en swore Krankheit opgeven. In dat glieke Johr hett se en Gospelchor grünnt. In de 1960er Johren hett se bito bi den christlichen Verlag „Frohe Botschaft“ in Wetzlar en Single mit twee Ledern vun Siegfried Fietz sungen (Wir sind nur eine Minderheit un Broadway).

AS se ehr Studium afbroken harr, hett Haller toeerst en Utbilln as Medizinisch-Technische Assistentin (MTA) maakt, de se 1970 mit ehr Examen afslaten hett. Se hett denn in’t Strahlen-Biocheemsche Labor vun de Georg-August-Universität Göttingen arbeit. 1971 hett se mit dat Singen anfungen. De Produzent Georg Moslener het tmit ehr die Single „Frühling in Vietnam“ opnahmen, de sik aver nich dörsetten künn. Haller hett nu Klavier spelen lehrt un künn al 1971 ehr eerst Album „Applaus für Hanne Haller“ opnehmen. Man, dit Wark is nich op’n Markt kamen, vun wegen dat de Plattenfirma in Konkurs gahn is.

Haller is dorophen na München ümtogen, woneem se den Beroop vun’n Toonmeester lehren de. Blangento hett se in verschedene Branchen arbeit un ok wieter Schallplatten opnahmen. Enn vun de 1970er Johren füng se ok an, sülvst to komponeeren. Dorto hett se sik dat Pseudonym Hansi Echner toleggt. De Singer Karel Gott hett 1978 dat vun ehr schrevene Leed „Wohin der Wind die Blätter weht“ rutbröcht. Vörher harr se ok al för Curd Jürgens dat Leed „60 Jahre und kein bisschen weise“ komponeert, dat tosamen mit sien Autobiografie rutkamen is.

Na eenige wietere Singles hett se 1979 de Mööglichkeit kregen as Singersche vör en grötter’t Publikum bekannt to warrn. Se hett mit den Titel „Goodbye, Chérie“ an de düütsche Vörutscheden to’n Eurovision Song Contest deelnahmen un is dor op’n sövten Platz kamen. Dorophen sünd wietere Schallplatten-Opnahmen maakt worrn, för de tomeist Bernd Meinunger de Texten schreven hett. Vun em weer ok de Text för dat Leed „Samstag Abend“, mit dat Hanne Haller 1981 Spood hatt hett. Mit dat Leed is se bit op Platz 11 vun de düütschen Charts kamen. In de Folg hett se mit Meinunger 1982 en Musikverlag grünnt. Siet de Tiet hett Haller ehr Titels in ehr egen Studio produzeert. In’t glieke Johr kreeg se ok to’n eersten mol de Goldene Stimmgavel.

1985 hett Haller de Musikgrupp Wind opdeckt, de mit dat vun ehr komponeerte Leed „Für alle“ an’n Eurovision Song Contest deelnahmen un den tweeten Platz beleggt hett. Na dissen Spood hett Haller ok för annere Künstler ne’e Titel schreven, as to’n Bispeel för Daliah Lavi, Elke Martens, Katja Ebstein (ü.a. dat Leed för de ARD-Feernsehlotterie 1986), Rex Gildo, Lena Valaitis, Caterina Valente, Jürgen Drews, Ingrid Peters, Wolfgang Fierek („Resi, i hol di mit mei'm Traktor ab“) un Milva. Se hett ok Rosanna Rocci opdeckt.

Na en poor Leder, de ’n beten Spood harrn, harr Haller 1989 ehrn tweeten kommerziellen Hit mit den Titel „Mein Lieber Mann“, dat bit op Platz 20 vun de Charts stegen is. Se weer dorna in tallrieke Feernsehsennen to sehn un hett mit ehr wieteren Slagerledern mehrere Hitparaden wunnen. 1992 hett se an’n Düütsch Song-Festival Schlager 92 deelnahmen un hett den Wettstriet mit ehr Leed „Schatz, ich will ja nicht meckern“ wunnen.

Vun ehr weer ok de Singer Leon opdekt, de 1996 den düütschen Vörentscheed to’n Eurovision Song Contest wunnen hett. De Titel is aver in en nich-apentliche Vör-Utwahl vun de EBU utscheedt. 1999 hett Haller mit „Während Du mich liebst“ bi de Düütschen Slager-Festspelen deelnahemn un is op’n veersten Platz lannt.

Ehr eerst Live-Kunzert hett se an’n 2. Februar 2003 maakt vör mehr as 1.200 Tokiekers. Dat weer de Optakt to en Tournee 2004. Dormit weer na lange Tiet mit „Vater unser“ ok wedder en Hit verbunnen, de faken vun de Radiosenners speelt weer. Dat Album „Mitten im Licht“, dat rechttietig to de Wiehnachtstiet op’n Markt kamen is, is veer Weken lang in de Media Control Album Charts instegen.

Hanne Haller is Mitt vun de 1990er Johren an Bostkrebs krank worrn. An’n 15. November 2005 is se an de Naklapp vun ehr Krankheit doodbleven. Na ehrn Dood is en Tosamenstellen vun ehr religiösen Leder („Wir sind nur Gast auf dieser Welt“) publizeert worrn. De Plattenfirma segg dorto, dat de al so plaant wesen is.

2008 is bekannt worrn, dat Haller Enn vun de 1980er Johren ruchweg veer Johren lang mit de Moderatersche Ramona Leiß tohopen leevt hett..

Utteken

• 1983: Düütsch Schallplattenpries vun de Phonoakademie
• 1989: Golden Stimmgavel
• 1990: Golden Noot
• 1990: Golden Schallplatt för Mein lieber Mann
• 1992: Golden Stimmgavel
• 1997: Golden Stimmgavel

Spoodrieke Leder

• Deckel auf Deckel zu 1979
• Goodbye, Chérie 1979
• Ich warte hier unten 1980
• Samstagabend 1980
• Geh nicht 1981
• Weil du ein zärtlicher Mann bist 1981
• Engel fallen nicht vom Himmel 1983
• Der Sandmann 1985
• Zeit für ein bisschen Zärtlichkeit 1985
• Ich hab' Dich unheimlich lieb 1985
• Starke Frauen weinen heimlich 1986
• Eine Wahnsinns Love Story 1987
• Hallo, lieber Gott 1987
• Mein lieber Mann 1989
• Bratkartoffeln mit Spiegelei 1990
• Willkommen im Leben 1991
• Schatz, ich will ja nicht meckern 1992
• Vater unser 2003
• Und hättest du die Liebe nicht (2004)

Diskografie

• 1976 – Komm, lass uns miteinander reden
• 1980 – Na und
• 1981 – Stärker als ich
• 1982 – Augenblicke
• 1984 – Eines Tages
• 1985 – Gefühlsroulette
• 1986 – Ganz normale Frau’n
• 1987 – Love Story (Best Of)
• 1988 – Liebe u.s.w.
• 1989 – Mein lieber Mann
• 1990 – Bratkartoffeln mit Spiegelei
• 1991 – Willkommen im Leben
• 1992 – Überall ist Bethlehem (Wiehnachtsalbum)
• 1993 – Immer mittendrin
• 1994 – Liebe hin – Liebe her
• 1996 – Verdammt ehrlich
• 1998 – Für alle Träumer
• 1999 – Ungeschminkt
• 2001 – Hellwach
• 2003 – Mitten im Licht
• 2004 – Gute Nachricht
• 2006 – Wir sind nur Gast auf dieser Welt (Best Of)
• 2007 – So long and goodbye (Live-Album)
• 2008 – Die unvollendeten Lieder

Dat eerste Album „Komm, lass uns miteinander reden“ is anfangs ünner den Titel „Applaus für Hanne Haller“ pulizeert worrn. In de Diskografie staht blots Studio-Alben un offizielle Best-Of-Tohopenstellen. Butendem sünd noch tallrieke annere Tosamenstellen vun verschedene Plattenfirmen un Neeoplagen vun öllere Studioalben rutkamen, de deelwies ne’e Titels harrn.

Weblenken

• Literatur vun un över Hanne Hallein de Düütschen Natschonalbökeree
• Websteed vun Hanne Haller
• Hanne Haller Fansiet