Hans-Hermann Tiedje

Hans-Hermann Tiedje (* 10. April 1949 in Sleswig) is en düütschen Journalist un Medienmanager.

Journalist

Tiedje is 1949 in Sleswig as Söhn von en Anstellten, de ut’n Tweten Weltkrieg blind trüchkamen is, un en Huusfro. He hett 1968 Abitur maakt un en Tied Politik in Kiel un denn Juristeree in Hamborg studeert, sien Studium aver nich afslaten. He hett denn en Volontariat bi’t Hambörger Avendbladd maakt. He weer von 1975 af an Redaktör bi de Welt un von 1980 bet 1986 bi de Bunte (Burda). Von 1986 bet 1988 weer he Viez bi de Bild un 1988 bet 1989 Chefredaktör bi de Bunte. He weer ok tohoop mit Margarete Schreinemakers Moderator von de NDR Talk Show bi’n NDR.

1989 is he Chefredaktör bi de Bild worrn. 1992 is he dor wedder weggahn un weer denn 1993 bet 1994 Baas von de Redakschoon bi Thomas Gottschalk sien Gottschalk Late Night op RTL. 1994 hett he de Tiedschrift Tango von’n Verlag Gruner + Jahr utklamüsert, grünnt un weer denn ok de Chefredaktör. De Tiedschrift weer denn aver al 1995 na 23 Utgaven in’n Sand sett.

Sied den 30. August 2006 modereert he tohoop mit Hajo Schumacher elk Week de Talkshow Links-Rechts op N24. Tiedje speelt dor den rechts-konservativen Part.

Ünnernehmer

1992 hett Tiedje de TV Media Medienmanagement GmbH in Ebersberg bi München mit grünnt, de sied 2000 en Dochterfirma von dat Ünnernehmen WMP Eurocom AG in Berlin is. Dor is Tiedje sieddem in’n Vörstand, Grootaktionär un sied April 2004 ok de Vörsitter von’n Vörstand. Dat Ünnernehmen weer 2003 in en lütten Skandal verwickelt, as se en ümstreden Beraderverdrag mit de Bundsagentur för Arbeit slaten harrn.

Sied 2005 is Tiedje tohoop mit Axel Hilpert Bedriever von dat Resort Schwielowsee bi Potsdam.

Tiedje is ok Viez-Vörsitter von’n Opsichtsraat von de Marseille-Kliniken AG.

Politik

1998 weer he in Kohl sien verloren Wahlkampf persönlich Berader von Bundskanzler Helmut Kohl