Hans Berckhemer

Hans Berckhemer (* 16. Januar 1926 in Stuttgart; † 23. Juli 2014) weer en düütschen Eerdphysiker.

Prof. Hans Berckhemer (2006)

Leven un Loopbahn

Berckhemer hett 1946 bit 1950 in Stuttgart Physik studeert un möök dor in’t Johr 1954 sien Dokter. Dorna güng he as’n Fulbrightstipendiat in de USA, woneem he an’t Lamont Geological Observatory vun de Columbia Universität New York un an’t Seismoloogsche Labor vun’t California Institute of Technology in Pasadena arbeit hett. He hett sik dorna denn an de Universität vun Frankfort habiliteert. Twee Johr later kreeg he dor sien Roop op den Lehrstool för de Physik vunvn Eerdkörper, den he bit to sien Utscheden 1993 bekleedt hett.

To Anfang weer Berckhemer bedeeligt an’t Entwickeln un Konstrueren vun Seismometers un weer een vun de Pioneeren vun de Breedband-Seismologie. In de 1970er Johren hett he mit dorto bidragen, dat de Seismoloogsche Zentralwacht Gräfenberg opboet worrn is. In de seismoloogschen Forschen sett he sik vör allen mit Herdvörgäng vun Eerdbeven un jemehr Brookvörgäng uteneen un mit jemehr Quantifizeeren dör physikaalsche Parameters. Dorto kemen Ünnersöken vun de Eerdköst un vun’n böveren Eerdmantel mit Bavenflachenbülgen un mit Methoden ut de Refrakschoonsseismik.

Later hett Berckhemer sien Forschen utwiet op de experimentelle Petrophysik. Dorför is in de Mitt vun de 1970er Johren en Steenlabor inricht worrn. To de eersten Stenen, de ünnersöcht worrn sünd, tellen Proven vun’n Maand, de dör de Apollo-Missionen mitbröcht worrn weern. In de Johren dorna sünd in Frankfort ok Stenen ut de Köst un den Mantel vun de Eer ünnersöcht worrn. In den Tosamenhang weer Berckhemer ok an’t Planen un Utbringen vun’t Kontinentale Deepbohrprojekt as ok an tallrieke annere Projekte bedeeligt.

Blangen de wetenschoppliche Forschensarbeit hett Berckhemer ok en Reeg vun Ämter bekleedt. To’n Bispeel weer he vun 1975 bit 1979 Präsident vun de International Association of Seismology and Physics of the Earth’s Interior (IASPEI), vun 1979 bit 1981 Vörsitter vun de Düütsche Eerdphysikalsche Sellschop (DGG) as ok Liddmaat vun de de Leopoldina. Siet 2001 weer Berckhemer Ehrenliddmaat bi de DGG.

Literatur

• Hans Berckhemer: Grundlagen der Geophysik. Wissensch. Buchgesellsch., 1990
• Hans Berckhemer: Die Erde im kosmischen Bombardement. Steiner (Franz), 2000

Weblenken

• Hans Berckhemer in de Düütschen Natschonalbökeree