Hartwig von Spreckelsen
Hartwig von Spreckelsen (* 24. März 1624 in Hamborg; † 30. Oktober 1680 in Ritzbüttel) weer en Hambörger Raadsherr.
Von Spreckelsen is 1624 as Söhn von Margaretha, borene Claen (Dochter von Joachim Claen), un den Koopmann Hartwig von Spreckelsen († 1658) in Hamborg boren.[1] He hett sik in’n Juli 1637 al mit 13 Johr an de Universität Rostock inschreven[2] un is 1643 in Hamborg op dat Akadeemsche Gymnasium gahn.[1] Na de School hett he 1644 anfungen, Juristeree an de Universität Altdorf to studeren. 1647 is he an de Universität Straßburg wesselt un 1650 an de Universität Basel. Dor hett he an’n 30. April 1650 dat Studium mit dat Lizentiat afslaten.[1] Na dat Studium is he dör Europa reist, hett för en Tied wedder in Hamborg leevt un is denn Hoffraad von Hartog Gustav Adolf von Mekelborg in Güstrow ween.[1]
1662 is he Richter an dat Neddergericht in Hamborg worrn.[1][3] 1663 is he in’n Hambörger Raad wählt worrn[1] un dor 1666 Prätor worrn. 1665 is he ok Kaspelsherr von St. Jacobi worrn.[1] Von’n 27. April 1671 bet 6. Juni 1677 weer he Amtmann von dat Amt Ritzbüttel.[1][4] He keem in’n Juni 1677 na Hamborg trügg un is Colonelherr in dat Kaspel Sankt Michaelis worrn. Nadem keen Raadsherr ut Hamborg as Amtmann na Ritzbüttel wull (von wegen de unsekere Laag in de Tied von’n Bremen-Veerner Feldtog), is von Spreckelsen an’n 21. März 1678 wedder as Amtmann wählt worrn un hett an’n 23. April dat Amt aktiv övernahmen.[1] De Wahl güll för söss Johr, aver he is denn al an’n 30. Oktober 1680 doodbleven.[1] An’n 1. November 1680 is he bi de Abundus-Kark in Groden begraven worrn.[1] Na sien Dood hett siene Weetfro as Verweser bet 1681 dat Leid över dat amt Ritzbüttel övernahmen.
Von Spreckelsen hett an’n 19. November 1660 Elisabeth Schnock freet. De beiden harrn dree Söhns un dree Döchter, ünner annern Johann, Hartwig un Margaretha.[1]
Warken
ännern- Disputatio inauguralis de iudicio multarum, vulgo Frävel-Gericht. Georg Decker, Basel 1651
Footnoten
ännern- ↑ a b c d e f g h i j k l Kurt Ferber: Die Gräber in der St. Abunduskirche zu Groden. - In: Zeitschrift des Vereins für Hamburgische Geschichte. Band 16, 1911, Sied 262f
- ↑ Indrag in dat Rostocker Matrikelportal
- ↑ Daniel Heinrich Jacobj: Geschichte des Hamburger Niedergerichts. Gustav Eduard Nolte, Hamborg 1866, Sied 233
- ↑ Heinrich Reinecke: Das Amt Ritzebüttel. Evert, 1935, Sied 143