Haubarg

Dit Woort hett noch annere Bedüden: kiek dorför ünner Haubarg (Landkreis Cuxhoben).

En Haubarg is en besünnere Oort Buernhuus, de dat meist blots op de Halfinsel Eiderstedt gifft. Egentlich kümmt düsse Oort to boon ut de Nedderlannen, de hebbt woll de „Remonstranten“ mitbröcht.

Rode Haubarg

Haubargen hefft en meist veereckig Bowies un en reten Dack, dat wiet daal-trucken is. In de Mitt is en so grote Deel, dat dor ok de Fohrwarken mit Peer un Wagen rinpasst. En grote Füersteed is ok dor binnen. Ringsüm sünd denn de Dööns, de groten Schlaapkamern för den Buern un sien Familie un de lütte Schlaapkomer för dat Gesinde op de en Siet. Op de anner Siet is dat Grootveeh anbunnen un ok dat Kleenveeh is dor ünnerbrocht. Platz för den Ploog, de Egg, de Döschmaschien un all den lütten Kleenkraam weer dor ok noch. De Hööftsaak over bi en Haubarg is, dat dat „Hau“ (Heu) ünner dat grote Dack över 'n Winter inlagert is.

Freuher, as de Lüüd mit de Diekeree noch nich so kloor weren, hebbt se de Haubargen op en Warft boot, wiel se bannig Manschetten vör de Stormfloten harrn.

Hüüt boot se ok wedder Hüüs, de so utseht as Haubargen. De hebbt man blots en annern Verwenn. Se ward meist för den Tourismus bruukt, wiel dor en Hotel or Fremmenkamern rinboot worrn sünd. Ok en Weertschop kann dor binnen sien.

Een goot bekannte, bannig ole Haubarg is de Rode Haubarg bi Witzwort, wovun dat en ole Vertelln gifft: De Düvel schall dat Huus för enen armen Knecht boot hebben. De harr em sien Seel dorför verspraken. He dacht, mit dat grote Huus kunn he de Dochter vun den rieken Buern freen. Hüüt hebbt se ut den Buernhoff en Museum maakt, wo een sehn kunn, as dat freuher weer. En goot Eten un Drinken gifft dat dor ok. En rodet Huus seukt de Beseukers aver ümsünst, de Bo is witt pöönt.

Op en anner Haubarg, De Riep bi Oldenswort is de gootkennte Sozioloog Ferenand Tönnies boren worrn.

Weblinks

• Der rote Haubarg (hoochdüütsch)
• Der Haubarg Hochdorf in Tating bei St.Peter-Ording (hoochdüütsch)
• 3 Haubarge in Welt (hoochdüütsch)