Miyazaki Hayao

Miyazaki Hayao (japaansch 宮崎駿; * 5. Januar 1941 in Tokio) is en japaanschen Speelbaas un Tekner för Animes.

Miyazaki Hayao 2008

Leven un Wark

Miyazaki is 1941 as tweet vun veer Kinner vun en Luftfohrtünnernehmer in Tokio boren. Dat weer de Tiet, dat de USA an’t Enn vun’n Tweten Weltkrieg veel Bomben op Tokio afsmeten hebbt un de Familie is na Utsunomiya op’t Land trocken, woneem he ok opwussen is. Na siene Schooltiet hett Miyazaki veer Johr Politikwetenschoppen un Ökonomie studeert. 1963 hett he aver bi de Produktschoonsfirma Studio Toei as Tekner för Anime anfungen. To’n Bispeel weer he ok bi de japaansche Reeg Heidi vun 1974 mit dorbi. Bi Toei hett he Isao Takahata kennenlehrt, mit den he later de Ghibli-Studios grünnt hett.

1979 möök Miyazaki mit Rupan Sansei: Kariosutoro no Shiro sien eersten Speelfilm. To Anfang vun de Johren 1980 hett he mit sien groot Projekt Naushika anfungen, mit dat he groot rut keem. De Manga is 1982 rutkamen un 1984 ok as Kinofilm Kaze no Tani no Naushika. Mit dissen Spood kunn he denn sien egen Studio, Studio Ghibli, opmaken. Blangen Kortfilmen hett he söven Speelfilmen maakt, mit de he to een vun de bedüdensten Filmemakers vun japaansche Animes worrn is.

Na Mononoke Hime, wat 1997 de mehrstbesöchte japaansche Film vun alle Tieden wesen is, hett Miyazaki seggt, dat he as Speelbaas Bott geven wull, jüngere Lüüd Platz to maken. Dat hett he denn aver doch nich wohr maakt un 2001 den Film Sen to chihiro no kamikakushi rutbröcht, de sik noch wedder beter verköff as Mononoke Hime un vele Priesen kregen hett.

Miyazaki sien jüngsten Film weer 2004 Hauru no ugoku shiro.

Ok Miyazaki sien Söhn Goro is Tekner un Speelbaas un arbeidt bi de Ghibli-Studios.

Filmografie (Utwahl)

Johr	Titel	Funkschoon
1969	Nagagutsu wo Haita Neko (長靴をはいた猫) dt.: Perix der Kater und die 3 Mausketiere	Animatschoon
1971	Dobutsu Takarajima (動物宝島) dt.: Die Schatzinsel	Teekner
1974	Arupusu no Shōjo Haiji (アルプスの少女ハイジ), Feernsehreeg dt.: Heidi	Teekner
1975	Furandāsu no Inu, Feernsehfolg dt.: Niklaas, ein Junge aus Flandern	Animatschoon
1976	Haha wo Tazunete Sanzenri (母をたずねて三千里), Feernsehreeg dt.: Marco	Teekner
1978	Mirai shōnen Konan (未来少年コナン), Feernsehreeg	Dreihbook Speelbaas
1979	Akage no An (赤毛のアン), Feernsehreeg dt.: Anna mit den roten Haaren	Teekner
1979	Rupan Sansei: Kariosutoro no Shiro (ルパン三世 カリオストロの城) dt.: Das Schloss des Cagliostro	Dreihbook Speelbaas
1980	Shin Rupan Sansei Special (新ルパン三世 SPECIAL), Feernsehfolgen	Dreihbook Speelbaas
1984	Kaze no Tani no Naushika (風の谷のナウシカ) dt.: Nausicaä aus dem Tal der Winde	Dreihbook Speelbaas
1986	Tenkū no Shiro Rapyuta (天空の城ラピュタ) dt.: Das Schloss im Himmel	Dreihbook Speelbaas
1988	Tonari no Totoro (となりのトトロ) dt.: Mein Nachbar Totoro	Dreihbook Speelbaas
1988	Hotaru no Haka (火垂の墓) dt.: Die letzen Glühwürmchen	Produzent
1989	Majo no Takkyūbin (魔女の宅急便) dt.: Kikis kleiner Lieferservice	Dreihbook Speelbaas
1991	Omohide Poro Poro (おもひでぽろぽろ) dt.: Tränen der Erinnerung	Dreihbook Speelbaas
1992	Kurenai no Buta (紅の豚) dt.: Porco Rosso	Dreihbook Speelbaas
1995	Mimi wo Sumaseba (耳をすませば) dt.: Stimme des Herzens	Dreihbook
1997	Mononoke Hime (もののけ姫) dt.: Prinzessin Mononoke	Dreihbook Speelbaas
2001	Sen to Chihiro no Kamikakushi (千と千尋の神隠し) dt.: Chihiros Reise ins Zauberland	Dreihbook Speelbaas
2002	Neko no Ongaeshi (猫の恩返し) dt.: Das Königreich der Katzen	Produzent
2004	Hauru no Ugoku Shiro (ハウルの動く城) dt.: Das wandelnde Schloss	Dreihbook Speelbaas
2008	Gake no ue no Ponyo (崖の上のポニョ) dt.: Ponyo das verzauberte Goldfischmädchen	Dreihbook Speelbaas

Priesen

• Golden Boor op de Berlinale 2002 för Sen to Chihiro no Kamikakushi (deelt mit’n Film Bloody Sunday)
• Oscar 2003 för Sen to Chihiro no Kamikakushi as best Animatschoonsfilm
• Opnahmen in de List vun de 100 bedüdensten Minschen op de Welt, TIME Magazine 2005
• nomineert för’n Oscar 2006 för Hauru no Ugoku Shiro as best Animatschoonsfilm

Weblenken

• Miyazaki Hayao in de Internet Movie Database (engelsch)