Hehlingen

Hehlingen is en Dörp mit üm un bi 1750 Inwahners, dat to Wulfsborg höört.

Wapen vun Hehlingen

Historie

Dat eerste Maal kummt Hehlingen in ene Oorkunn vun Bischop Reinhard vun Halberstadt an’n 9. August 1112 vör. Vun de Kark warrt toeerst in ene Oorkunn vun’n 28. Mai 1178 spraken.

Anners as de Ümgegend weer Hehlingen bet 1932 nich Besitt vun de Welfen, man vun Meideborg un later vun Brannenborg. Dat höör toletzt vör 1932 to’n Landkreis Gardelegen, denn to’n Landkreis Gifhorn.

Mit de Kommunalreform vun’n 1. Juli 1972 keem Hehlingen vun den Landkreis Gifhorn to de Gemeend Wulfsborg.

Roland

In Hehlingen stünn wohrschienlich in’t 15. Johrhunnert en Roland, de na de Legenn na en poor Johren, de he dor stünn, 1419 vun Haldensleven röövt worrn is, woneem he nu noch steiht. To de 900-Johr-Fier vun Hehlingen 2012 schall de Roland as Nabildung vun Georg Arfmann wedder opstellt warrn.

Inwahnertall

Johr	1910	1925	1933	1939
Inwahners	548	536	515	507

Wapen

Dat Wapen wiest op rood sülvern den Hehlinger Roland, de vun’n Schilddreger ut sehn na rechts kickt. In’e rechte Hand hett he en Sweert, dat he hoochhöllt.

Dat Wapen weer al lang in allgemeen Gebruuk as de Gemeenraat an’n 8. Februar 1979 dat Wapen ok offiziell annahmen hett.

Füürwehr

1876 geev dat en groten Brand in Hehlingen bi den veel Hüüs afbrennt sünd. 1886 geev dat denn de eerste Plichtfüürwehr. De harr lang blot eenfach Warktüüch so as Ammers un Patschen. Eerst 1939 keem de eerste Sprütt. 1943 denn is ut de Plichtfüürwehr ene freewillige Füürwehr worrn. In en nee Gerätehuus is de Füürwehr an’n 28. April 1979 intagen. In’n Mai 2001 hett de Füürwehr beslaten, noch wedder en nee Gerätehuus to boon. Noch bevör dat trech weer, is an’n 9. Juli 2001 dat ole Huus afbrennt. Eerst an’n 14. September 2002 weer dat ne’e Gerätehuus trech.

Politik

As Stadtdeel vun Wulfsborg hett Hehlingen ’n Oortsraat un -börgermeester. Dat is in de Wahlperiood 2006 bet 2011 Klaus Schröder. In’n Raat sitt fief Raatslüüd vun de CDU un twee vun de SPD.

Kultur

En Freebaad hett Hehlingen siet 1969/1970.

Scholen

Hehlingen hett ene Grundschool. Op Haupt- un Realschool un Gymnasium gaht de Schölers na Wulfsborg.

Literatur

• K. Bode: Das tausendjährige Hehlingen im Wolfsburger Ländchen und der Hehlinger Roland. Hehlingen 1930

Links

Freibad Hehlingen