Hein Brandt weer en Börger vun de Stadt Hamborg.

Brandt harr den Hartog Johann vun Sassen-Loonborg Geld lehnt un wull dat nu trüchhebben, as he em op de Straat lopen seh. Doch de Hertog segg, dat he vun’n Raat free Geleit harr un dat Brandt em nix künn. Dor wörr Brandt füünsch un füng dat Schimpen an. De Hertog vertell dat den Raat, de nu Gendarmen utsennen dei, de Brandt festnahmen hebbt. 1410 weer dat allens. Doch siet 1405 geev dat en Gesett, dat nüms in’t Gefängnis dröff smeten warrn, de keen Perzess hett harr. Dor geev dat ünner de Börger vun Hamborg en Opstand, de wullen sik dat nich gefallen laten. De Luft brenn al länger, in’n Raat seten blot feine Lüüd un de Börgers föhlen sik jümmer mehr as wenn se gor nix to seggen harrn. Dat, wat mit Brandt schehn weer, dat weer denn de Druppen, de dat Fatt to’n Överlopen bröcht hett. De Hambörgers hebbt ’n Opstand maakt. Brandt is dor denn wedder bi freekamen.

De Opstand föhr denn na veer Daag verhanneln mit Börgermeester Kersten Miles to de eerste Verfaten in Hamborg, de segg, dat nüms ahn Perzess in Haft kamen dröff, dat de Raat de Börgers fragen mutt, wenn he Krieg föhren will, dat nüms free Geleit vun’n Raat kriegen schall, de Schullen bi Hamborger Börgers hett un dat de, de för de Stadt arbeiden dein un de untro weren, aflohnt schöölt warrn.

Na em is de Brandstwiet in de Ooltstadt vun Hamborg nöömt, in de he to de Tiet wahnen dee.