Heinrich Book
Heinrich Book (* 6. Januar 1914 in Loorpe; † 14. April 2012 in Sendenhorst) weer en plattdüütschen Schriever.
Book is 1914 as sösst von negen Kinner op’n Buurhoff von sien Öllern in Loorpe boren. Sien Twillings-Brouer was loterhen de Buur up den Hoop. De beiden härn sük masse tau säggen und woorn van de beiden öllerrn Süsters Anna un Sina ok god inhüset. Hinnerk is ümme 1928 na Borbeck gahn un dor bi de Salesianer von Don Bosco op School wesen. De School afslaten hett he 1937 op dat Gymnasium Borbeck. Denn hett he an de Philosophisch-Theoloogsche Hoogschool Benediktbeuern Philosophie, Pädagogik un theoloogsche Propädeutik studeert. Mit’n Tweten Weltkrieg is he Soldaat worrn un weer toeerst an de Westfront in Frankriek un denn an de Oostfront in Russland.He is swoor versehrt worrn un weer lang in’t Lazarett. Dor hett he sien Medizinstudium anfungen, dat he 1948 an de Universität Mönster mit’n Doktertitel trechmaakt hett.
Book weer Assistenzdokter in Friesoythe un Ollnborg, as wetenschoplichen Assistent an de Orthopäädsche Universitätsklinik Mönster un denn as dallaten Dokter för Orthopädie in Ossenbrügge. 1957 is he Chefdokter an dat Sankt-Josef-Stift in Sendenhorst worrn. Dat is he bet 1980 bleven un hett in’n Rohstand noch wieder as dallaten Dokter för Orthopädie arbeidt.
In’n Rohstand hett he dat Schrieven anfungen un blangen Gedichtbannen ok en plattdüütsch Wöörbook von sien Heimatoort Loorpe op’n Hümmelgen rutgeven un Antoine de Saint-Exupéry sien Lüttken Prinz na’t Plattdüütsche översett. 2002 is he Ehrenbörger von Loorpe worrn. 2011 hett he de Landschopsmedallje von de Eemslandsche Landschop kregen.
He weer verheiraadt mit Maria-Ursula Book, borene Schlingmann.
Warken
ännern- Wegwarte. 1991
- Hümmlinger Wörterbuch. Verlag von’n Eemslandschen Heimatbund, Sögel 1993, ISBN 3-88077-127-8
- Leeiwerksbrood. Hümmelske Vertellßels. Goldschmidt, Werlte 1995, ISBN 3-927099-32-5
- De lüttke Prinz. Goldschmidt-Druck, Werlte 2004, ISBN 3-927099-90-2
- Verborgener Brunnen. Anthologie im Alter. 2010
Weblenken
ännern- Heinrich Book in de Datenbank Die niederdeutsche Literatur (hoogdüütsch)
|
De Artikel „Heinrich Book“ is een exklusiven Artikel up de Plattdüütsche Wikiepdia. In anner Spraakuutgaven is de nich to finnen. |