Heinrich Vollers

Heinrich Vollers (* 19. Februar 1583 in Berne; † 1656 ok dor) weer en Huusmann in Schlüte, Organist un een von de eersten Chronisten von dat Ollnbörger Land.

Na’n Dood von’n eersten Berner Organist Gert Vollers is sien Söhn Heinrich al mit 16 von’n Karkenraad as sien Nafolger wählt worrn. Dat Örgelspeel harr he al lehrt, as he noch Schöler von de Parrschool in Berne weer. De Vaagd Enke Stadländer harr em ok Ünnerricht in Arithmetik un Geodäsie geven. Tosätzlich to’n arvten Buurhoff un dat Organistenamt hett he bald noch mehr Opgaven övernahmen. Bi dat Vermeten von dat Stedingerland hett he dat över 500 Sieden lange Protokoll föhrt. 1609 is he as Karkenjuraat wählt worrn un hett en Reeg Johrteihnte lang de Karkenrekenböker schreven. 1619 is he as Rekenföhrer för all Amtsreken von de Graafschop Demost bestellt worrn.

Blangen all düsse Opgaven hett Vollers en meist 1000 Sieden starke Kröönk von dat Stedingerland schreven un tosätzlich noch Gedichten un Leder. Vollers harr ut twee Ehn alltohoop 18 Kinner. Twee von siene Söhns weren Pastoorn un dree weren Organisten oder Raads- un Stadtmuuskanten.

Vollers Schriften liggt vondaag in de Landsbibliothek Ollnborg, dat Staatsarchiv Ollnborg un to’n Deel ok in dat Archiv von de Karkengemeen Berne.