Helge Fuhst

Helge Fuhst (* 2. März 1984 in Hannover) is en düütschen Journalist, Moderator un Medienmanager. Siet Januar 2018 is he ARD-Programmgeschäftsföhrer von Phoenix.

Leben

Fuhst is 1984 in Hannover boren un in Hannover un Cuxhoben opwussen. Dat Abitur hett he an dat Amandus-Abendroth-Gymnasium in Cuxhoben maakt. Na de School hett he an de Leibniz Universität Hannover Politikwetenschop un Geschicht studeert un düt Studium 2010 mit en Magister afslaten. 2014 is Fuhst an de TU Chemnitz promoveert worrn. Siene Dokterarbeid weer över de eerste Amtstied von US-Präsident Obama.

2008 un 2009 hett Fuhst as Producer in dat ARD-Studio in Washington, D.C. arbeidt. Vörher weer he en halv Johr in de Tied von de Vörwahlen to de US-Präsidentenwahl Hospitant bi NBC News in Washington.

Sien Volontariat as Journalist hett he bi’n NDR maakt. As Feernsehautor harr he vörher al in dat NDR-Landsfunkhuus in Hannover arbeidt. 2012 un 2013 weer Fuhst bi de ARD-Tagesthemen in Hamborg.

2013 is Fuhst na’n WDR na Köln wesselt. Dor is he persönlichen Referent von’n Intendant un later tosätzlich Viez-Baas von de Intendanz worrn. Von 2016 af an harr Fuhst dat Leid över dat Afdeel Zentrale Opgaven un Programm-Management bi Phoenix un hett as Viez-Programmgeschäftsföhrer ok Verantwortung för den kumpletten Feernsehsenner övernahmen.

2016 bet 2017 weer he Moderator bi de Narichtensendung „Phoenix der Tag“ un bi Sonnersendungen.

An’n 26. Juni 2017 hebbt de ARD-Intendanten Fuhst to’n ne’en Programmgeschäftsföhrer von Phoenix wählt. Düt Amt hett he an’n 1. Januar 2018 antreden.

Siet Oktober 2017 modereert Fuhst de polietsche Diskuschoonssendung „Unter den Linden“, maandags avends Veerdel na teihn bi Phoenix. Fuhst is ok Gastgever von de Sendung „Internationaler Frühschoppen“.

Jury-Maat

Fuhst is siet 2016 Maat von de Jury von’n RIAS Journalistenpries un von de Semi Final Round von’n International Emmy Award.