Herbert Helmrich

düütsch Politiker

Herbert Helmrich (* 1. Januar 1934 in Luckau; † 24. Oktober 2017 in Bookholt) weer en düütschen Jurist un Politiker von de CDU.

Helmrich is 1934 in Luckau boren un hett eerst in de DDR leevt. Nadem he 1952 un 1953 ut polietsche Grünn verhaft worrn is, is he 1954 in de Bundsrepublik Düütschland flücht.

Na dat Abitur in Göttingen hett Helmrich anfungen Juristeree, Volksweertschop un Soziologie an de Universität Göttingen to studeren. Dat Studium hett he 1963 mit de eerste un 1967 mit de twete juristische Staatsprüfung afslaten. He is 1967 as Avkaat tolaten worrn un hett in ene Kanzlie in Bookholt arbeidt. 1969 is he ok as Notar tolaten worrn. 1982 hett he de Sellschop för Effizienz in Staat un Verwaltung (GFE) grünnt.

Helmrich is 1966 in de CDU rin. He weer Liddmaat von’n Bundsarbeidskreis Christlich-Demokraatsche Juristen (BACDJ) un von 1992 bet 2001 de Vörsitter von’n Arbeidskreis. He hett sik ok in de Middelstands- un Weertschopsvereenigung von de CDU/CSU (MIT) engascheert.

Helmrich is bi de Wahl 1976 för den Wahlkreis Horborg-Soltau in’n Düütschen Bundsdag wählt worrn. He weer dor Liddmaat von’n Rechtsutschuss un von 1984 bet 1992 Vörsitter von’n Rechtsutschuss. Bi de Wahlen 1980, 1983, 1987 un 1990 is he in’n Wahlkreis Horborg wählt worrn.

Helmrich is an’n 19. März 1992 Minister för Justiz-, Bunds- un Europaangelegenheiten in de Regerung von Ministerpräsident Berndt Seite in Mekelborg-Vörpommern worrn. Dorüm hett he an’n 21. Mai 1992 sien Mandaat in’n Bundsdag afgeven. Nadem Lothar Kupfer sien Amt opgeven hett, harr Helmrich von’n 11. bet 18. Februar 1993 kommissarsch ok dat Leid över dat Binnenministerium. As de CDU mit de SPD en Koalitschoon billt hett, is he an’n 9. Dezember 1994 ut de Regerung rut. Von 1994 bet 2002 weer he Liddmaat von’n Landdag Mekelborg-Vörpommern. Dor harr he von 1994 bet 1998 dat Leid över den Rechtsutschuss.

2002 is he Vörsitter von de CDU-Kommission för de Verwaltungsreform von dat Land Mekelborg-Vörpommern worrn.

Ehren ännern