Herbert Sisnett

Herbert Kortright McDonnell Sisnett (* 1862 in Barbados; † 3. Juni 1937 in London) weer von 1922 bet 1931 Chief Justice von Brietsch-Honduras.

Sisnett is 1862 as Söhn von’n Pastoor G. W. Sisnett von de Kark St. George’s in Saint George (Barbados) boren un güng dor op de Lodge School un dat Harrison College.[1][2] He keem denn na England, üm Juristeree to studeren un is in’n Mai 1896 Avkaat un Maat von’n Inner Temple worrn. Sisnett hett von Juni 1897 bet Februar 1898 in Barbados as Avkaat praktizeert un weer in düsse Tied ok Polizeimagistraat in Bridgetown.[1][2] He is na Jamaika gahn un hett dor verscheden Ämter utöövt.[1] Ünner annern weer he 1902 Sekretär von Guvernör Sydney Olivier un weer 1903 bet 1906 Magistraat in verscheden Parishes.[1]

In’n April 1907 hett he dat Amt as Registrar General (also böversten Standsbeamten) un District Commissioner in Brietsch-Honduras övernahmen.[1] 1913 is he Stipendiärmagistraat in Brietsch-Guayana worrn un hett ok de Kuli-Opstänn op de Rose-Hall-Plantaasch ünnersöcht.[2] Von 1919 bet 1920 weer he Vertreder as Generaalstaatsanwalt.[1] Von 1920 bet 1921 is he as Puisne Judge na Jamaika gahn un keem denn as Chief Justice na Brietsch-Honduras trügg.[1] Düt Amt harr he von 1922 bet 1931, as he in Rohstand gahn is.[1]

Nadem Sisnett 1937 doodbleven is, is he op’n Croydon Cemetery in Croydon (London) begraven worrn.

Sisnett hett 1893 Mary Helena Deane (* 1875) freet. De beiden harrn een Söhn un een Dochter.[2]

EhrenBearbeiten

To Neejohr 1927 is Sisnett Knight Bachelor worrn.

FootnotenBearbeiten

  1. a b c d e f g h The Marcus Garvey and Universal Negro Improvement Association Papers. University of California Press, 1983, Sied 300
  2. a b c d Obituary in The Law Times. Office of The Law Times, 1937, Sied 462