Hermann Konrad Eggers
Hermann Konrad Eggers (* 24. November 1851 in Maanze; † üm 1910) weer en düütschen Offzeer in de Prüüßsche Armee un Familienforscher.
Eggers is 1851 as Söhn von Maria Clara, borene Kestner (25. Mai 1826–28. September 1903), un den Amtmann Konrad Johann Eggers (2. Dezember 1813–21. Februar 1871) in Maanze boren.[1] He hett eerst Ünnerricht bi Huuslehrers kregen un weer denn von Oostern 1865 bet Oostern 1870 op dat Lyzeum in Hannover.[1]
As 1870 de Düütsch-Franzöösche Krieg utbraken is, is he as Avantageur in dat Infanterie-Regiment Nr. 17 intreden.[1] He weer von 28. Juli bet 12. Oktober 1870 Rekruut un hett in Berlin dat Fähnrichs-Examen maakt.[1] Na dat Examen is he in’t Feld schickt worrn.[1] He hett an’n 9. Januar 1871 den Rang von en Gefreeten kregen un an’n 7. Februar von en Portepee-Fähnrich.[1] An’n 14. Juni 1871 is he in Breisach Seconde-Leutnant worrn un weer denn von’n 17. Juli 1871 bet 1. Oktober 1873 in Mühlhausen.[1] He is an en akadeemschen Kursus in Kassel kummandeert worrn, weer denn in Neu-Breisach un von’n 23. März 1875 bet 13. März 1880 as Erzieher an dat Kadettenhuus in Plöön.[1] Al to’n 23. August 1879 hebbt se em in dat Infanterie-Regiment Nr. 75 in Bremen versett.[2] Den Rang von en Premier-Leutnant hett he denn an’n 22. März 1881 kregen un weer von’n 19. Oktober 1882 bet 1. Oktober 1885 Adjutant von dat Bezirkskummando Bremen.[2]
An’n 22. März 1888 is he Hauptmann un Baas von de 9. Kumpanie von dat Infanterie-Regiment Nr. 75 worrn.[2] An’n 12. September 1896 is he Major un sien Regiment aggregeert worrn.[2] Later weer he Oberstleutnant un Kummandör von’n Landwehrbezirk Lübeck un toletzt Oberst in dat Infanterie-Regiment Nr. 75.
Eggers weer in’n Düütsch-Franzööschen Krieg 1870/1871 (ünner annern Slacht bi Orléans, Slacht bi Le Mans) an aktive Gefechten bedeligt.[2]
Eggers hett sik blangen sien Beroop as Offzeer mit de Familiengeschicht von siene Vörfohren utenannersett un dor en Reeg Schriften över rutbrocht. In’n April 1885 hett he siene Familienünnerlagen an dat Staatsarchiv Hannover afgeven un in de Johren na 1885 dor jümmer noch wedder Ünnerlagen aflevert. De Akten sünd in’n Tweten Weltkrieg bi en Bummenangreep op Hannover an’n 9. Oktober 1943 verbrennt.[3]
Eggers hett an’n 22. Mai 1883 in Bremen Pauline Luise Adami (* 2. März 1851) freet. De beiden harrn de Kinner Marie Elisabeth Clara (* 13. März 1884) un Agnes Eggers (* 16. September 1900).[4]
Warken ännern
- Geschichte des Geschlechtes Eggers nebst Stammbäumen, Wappentafeln und Familienportraits, zusammengestellt aus den Familienpapieren, Urkunden, Archiv- und Kirchennachrichten. Band 1, Plöön 1879; Band 2, Horborg 1887; Band 3, Lübeck 1907
- Die Kestner. Eine genealogische Skizze nebst Excursen und einer Wappentafel. Bremen 1882
- Offizier-Stammrollen des Königlich Preußischen 1. Hanseatischen Infanterie Regiments No. 75 1866–1897. J. Behrens, Bremen 1897
Footnoten ännern
- ↑ a b c d e f g h Hermann Konrad Eggers: Geschichte des Geschlechts Eggers. Band 1, Plöön 1879, Sieden 87—89
- ↑ a b c d e Hermann Konrad Eggers: Offizier-Stammrollen des Königlich Preußischen 1. Hanseatischen Infanterie Regiments No. 75 1866–1897. J. Behrens, Bremen 1897, Sied 32
- ↑ Veröffentlichungen der Niedersächsischen Archivverwaltung. Band 47, Vandenhoeck & Ruprecht, 1992, Sied 179
- ↑ Indrag op Geneanet.org