Hope (Neeseeland)

Hope is en lütt Oort in’n Distrikt Tasman op de Süüdinsel von Neeseeland.

Lüttje Kark an de Ranzau Road

Hope liggt na beide Sieden hen an de Straat 6, de von Nelson in’n Noordoosten över Stoke un Richmond na Brightwater in’n Süüdwesten löppt. Bi Richmond geiht de Straat 60 von de 6 na Noordwesten af un löppt na Tasman.

De Wairoa flütt von Süden her in’n Westen an Hope langs un löppt as Waimea in’n Noorden in de Tasman-Bucht.

De Oort is von Mekelbörgers ut’n Klützer Oort grünnt worrn, de de Neeseeland-Sellschop 1843 anwarven harr. De Oort hett toeerst Ranzau heten (na’n Greev Kuno von Rantzau-Bredenborg, de de Utwannerers ünnerstütt harr).

De 141 Lüüd, de op de Bark Skiold ünner Leid von Carl un Feodor Kelling an’n 21. April 1844 in Hamborg afreist un an’n 1. September 1844 in Nelson ankamen sünd, hebbt 150 Acre Land in dat Waimea-Rebeed tospraken kregen. De Oort hett 1917 in’n Eersten Weltkrieg, as Neeseeland an de Sied von Grootbritannien Kriegsgegner von Düütschland weer un Teken von düütsche Kultur nich good leden weren, denn den ne’en Naam Hope kregen, na Lady Jane Hope.

Schoolünnerricht hett dat toeerst 1845 in dat Huus von Feodor Kelling geven. Domals op Düütsch. Dat eerste Schoolhuus is 1848 trech worrn. De luthersch-evangeelsche Kark is 1849 boot worrn. Later is dor denn ok noch de Hope Community Church tokamen. En neet Schoolhuus för de Ranzau-School is 1908 boot worrn un vondaag gifft dat mit de Hope-School ok noch en twete School.

As de Mekelbörger F. Krull 1862 de Kolonie besöcht hett, hett he dor en Dörp von 400 Lüüd funnen, in dat de Lüüd all Plattdüütsch snackt hebbt un Engelsch kuum kunnen, de Hüüs na Mekelbörger Oort boot un Mekelbörger Brüük pleegt hebbt. Plattdüütsche Spraak un Oort sünd later aver utstorven.

De Oort is vondaag vör allen von de Bueree präägt.