Horst Backat

Horst Backat (* 16. Dezember 1935 in Braackel; † 26. Oktober 2020) weer en düütscn Radrennfohrer.

Backat is 1935 in Braackel boren. He hett later in Baukem leevt. Backat dükert toeerst 1955 in de Ergeevnislisten von överregionale Stratenrennens op. Bi’t Stratenrennen Rund um Düren hett he mit domals 19 Johr dat eerste Maal en grötter Rennen wunnen. Bi de düütsche Amateurmeesterschop von de Stratenfohrers 1955 hett Backat den 3. Platz maakt.

1956 is Backat in dat Profilager wesselt un is toeerst för dat düütsche Team Altenburger föhrt, bi dat ok Hennes Junkermann un Franz Reitz ünner Verdrag weern. He hett bi’n Groten Pries von Veith wunnen un hett den 2. Platz bi de düütsche Stratenmeesterschop von de Profis maakt. Bi de Tour de Suisse 1956 is he op’n 13. Platz lannt. Backat weer denn bi de Stratenweltmeesterschop 1956 mit dorbi. De Fohrt weer von slecht Weder präägt un Backat weer blangen Emil Reinecke een von twee düütsche Fohrers, de dat Rennen toenn föhrt hebbt (von toeerst acht). Von de 28 klassifizeerten Fohrers hett Backat den 25. Platz maakt. Nadem he 1957 ahn Spood bi de internatschonalen Rennens Mailand–Sanremo (124.) un Gent–Wevelgem (43.) mitmaakt hett, weer he dat Johr denn ok wedder bi de Stratenweltmeesterschop. In’t Regenrennen von Waregem (Belgien) hett he ünner 34 Platzeerte den vörletzten Platz maakt. 1958 is Backat för de düütschen Teams Copravit un Torpedo föhrt, is aver in de Ergeevnislisten narms mehr opdükert. Na de Saison 1958 hett Backat sien Loopbahn as Profi opgeven.

Weblenken

Porträt bi www.radsportseiten.net (hoochdüütsch)
Resultate bei www.museociclismo.it (italieensch)