Hypozentrum

Dat Hypozentrum (gr.: hypo „dorünner“) is de Steed, vun wo ut een Eerdbeven utgeiht. Vör lütte Eerdbeven is dat Hypozentrum gliektosetten mit den Eerdbevenherd, bi gröttere Beven is dormit de Oort meent, woneem dat Beven losgeiht (Nukleatschoonspunkt).

Dat Hypozentrum warrt beschreven dör dat Epizentrum vun’t Beven un de Deep ünner de Eerdböverflach. Mit dat Hypozentrum is also de Brookflach sülvst meent, wiel dat Epizentrum den geograafschen Oort beschrifft un somit de piellieke Projekschoon vun’t Hypozentrum op de Böverflach dorstellt. Bestimmt warrt dat Hypozentrum dör Utwerten vun Looptietünnerscheden vun verscheden seismische Bülgenphasen an Meetstatschonen, de över de Eer verdeelt sünd. Dat Bestimmen vun’t Hypozentrum warrt in de Seismologie ok as Lokaliseeren betekent.

Dat Lokaliseeren hett aver ’n Fehler. Dat kummt to’n een dorvun, dat de Seismologen dat dorbi mit Bülgen to doon hebbt. Wo nipp un nau en Hypozentrum bestimmt warrn kann, hangt vun de Bülgenläng af. Je körter de Bülgenläng, desto nauer kann de Oort bestimmt warrn. To’n annern mööt dorför ok de Snelligkeiten, mit de sik de ünnerscheedlichen Bülgen utbreedt goot bekannt wesen, dat tomeist aver ok blots afschätzt warrn künnt. Un nich toletzt is to bedenken, dat de Herdflach vun en Eerdbeven normalerwies keen punktförmig Born is, as dat för de meisten Beven vereenfacht annahmen warrt, man en Flach mit en sietlich Utdehnen.