ISO 21482
In de Norm ISO 21482 warrt en Warnteken för gefährliche radioaktive Stoffen beschreven, dat vun de Internatschonalen Atomenergiekomisschoon (IAEO) mit utklamüstert worrn is.
As in’t Bild wiest, besteiht dat Teken ut en root Dreeeck, dat in de böveren Eck dat Teken för Radioaktivität („Trefoil“) wiest, vun dat Strahlen na ünnen utgaht. Ünnen links is en Dodenkopp to sehn, ünnen rechts en Minsch, de weglopen deit. Dat Weglopen warrt tosätzlich dör en Piel andüüt, de na buten dat Schild wiesen deit.
De ro’e Farv is as Achtergrund utsöcht worrn, vunwegen dat Kinner seggen deen, dat Root de Klöör is, de op Gefohren henwiest un nich Geel, as dat bi dat öllere Warnteken is. Butendem harrn Kinner dat Trefoil-Teken verkehrt verstahn un för en Propeller hollen.[1] Dat Gallup-Institut hett dat ne’e Teken vun 1650 Lüüd bekieken un beweerten laten un dat dorophen anraat.
Dat ne’e Warnteken schall nich an Steed vun dat öllere Teken bruukt warrn, man as tosätzlichen Henwies. Anners as dat Trefoil-Teken schall dit Warnteken ok Minschen, de vun de Radioaktivität un vun dat abstrakte Gefohrenteken nix weet, kloormaken, dat se in grote Gefohr sünd un gau weggahn mööt. De Grund för dat Utklamüstern vun dat ne’e Teken leeg dorin, dat in Entwicklungslänner deelwies döödliche Unfäll passeert sünd, vunwegen dat Minschen stark radioaktive Stoffen ut jemehr Afschirmen rutnahmen harrn (to’n Bispeel bi’n Goiânia-Unfall, de 1987 in Brasilien passeert is, oder de Nuklearunfall vun Samut Prakan 2000 in Thailand). Dat ne’e Warnteken warrt dorüm nich as dat Trefoil-Teken op de schulen Fatten oder Afschirmen anbröcht man direkt op de radioaktiev Strahlers mit de höchsten Strahlenkategorien 1, 2 un 3. An swacke Strahlers as de Afschirmen warrt ok in Tokumst blots dat olle Teken anbröcht, vun wegen dat se keen direkte Gefohr dorstellt. Ok Rüüm, in de strahlen Redschoppen oder radioaktive Stoffen lagert warrt, warrt wieter mit dat olle Teken kenntekent.
In Düütschland is dat ne’e Gefohrenteken nich in en natschonale Norm övernahmen worrn un ok nich in de Unfallverhödensvörschriften opnahmen worrn. Ok in den Vörslag för de Neefaten vun de DIN 4844-2, de Warnschiller regeln deit, is dat Teken nich binnen.