Ingeborg Hoffmann
Ingeborg Hoffmann (borene Hellmich; * 26. November 1923 in Prag; † 24. April 2012[1] in Honerdingen) weer en düütsche Politikerin von de CDU.
Hoffmann is 1923 as Dochter von Hildegard, borene Kick, un den Avkaat Oswald Hellmich in Prag boren[2] un weer na dat Abitur an dat Mädchenreformrealgymnasium in Prag 1942 noch op de Högere Hannelsschool, de se in’n Dezember 1944 afslaten hett. Se hett dree Semesters Volksweertschopslehr studeert.
Hellmich hett an’n 18. April 1942 in Prag Hans Stoppel (23. Juni 1916-13. Juli 1945) freet. De beiden hebbt de Söhns Johannes Peter (* 13. Juli 1943) un Martin (* 15. März 1945) hatt.[2]
In’n April 1945 is de Familie ut Prag na dat Sudentenland flücht. Hans Stoppel weer Soldaat ween. An’t Enn von’n Tweten Weltkrieg hett he de Uniform afleggt un wull sik na siene Familie dörslahn. In’n Juli 1945 is ehr Mann von de Tschechen aver doodschaten worrn.[2]
Ingeborg Stoppel hett Spraakstudien in Frankriek un England daan un Schauspeel lehrt. Bet 1947 hett se as Schauspelerin arbeidt, toletzt an’t Theater in Nordhorn. As dat Theater Enn 1947 dichtmaken mutt, hett se en Arbeid as Telefonistin in’n Landkreisdag Noordrhien-Westfalen in Düsseldörp annahmen. Von 1948 bet 1950 hett se as Sekretärin un von 1950 bet 1954 as Sakenbearbeiderin in’n Landkreisdag arbeidt.[2]
In twete Eh hett se an’n 18. Dezember 1954 in Berlin Erwin Hoffmann (2. Oktober 1908-6. Juni 1996) freet. De beiden harrn den Söhn Hans Erland (* 10. August 1955).[2] Mit ehren tweten Ehmann hett se in’n Juli 1956 dat Gasthuus Die Schlossquelle in Frankfort an’n Main apenmaakt. 1959 hebbt se noch en tweet Gasthuus in Frankfort-Goldstein apenmaakt, Die Parkgaststätten. 1963 hebbt se de beiden Gasthüüs in Frankfort afgeven un den Rasthoff Waldmohr an de Autobahn 6 apenmaakt.[2]
1968 is se in de CDU rin. Se is 1969 Oortsvörsitterin in Waldmohr worrn, weer von 1969 bet 1972 Maat von’n Kreisdag un Kreisvörsitterin von de CDU in’n Landkreis Kusel.
To’n Johrswessel 1972/1973 hebbt se den Rasthoff Waldmohr wedder afgeven un hebbt den Rasthoff Grundbargsee bi Söttmer an de Autobahn 1 övernahmen.[2]
1975 hett de Familie sik en Huus in Evernhusen boot. 1978 hett se to de Mitgrünners von de Europääsche Middelstandsunion (EMSU) höört. 1982 hett se von Christian Schwarz-Schilling dat Amt as Präsident von dat Exekutivbüro von de EMSU övernahmen.[2]
Hoffmann weer in’n Düütschen Hotel- un Gaststedenverband. Se weer för de CDU von 1976 bet 1990 Afornte von’n Düütschen Bundsdag. 1976 is se in’n Wahlkreis Hoya un in de dree annern Legislaturperioden in’n Wahlkreis Soltau-Fambossel-Rodenborg II direkt wählt worrn.[3] In de 8. Wahlperiood weer se Maat von’n Verkehrsutschuss, Viez-Maat von’n Verdedigungsutschuss (bet November 1977) un den Utschuss för Junge Lüüd, Familie un Gesundheit (na November 1977). In de 9. bet 11. Wahlperiood weer se Maat in’n Utwärtigen Utschuss. In de 9. Wahlperiood weer se Viez-Maat in’n Utschuss för Arbeid un Sozialordnung un in de 11. Wahlperiood Viez-Maat von’n Utschuss för Junge Lüüd, Familie, Froonslüüd un Gesundheit (bet Oktober 1990), von’n Utschuss för Forschung un Technologie (bet Oktober 1990) un von’n Kuntrullutschuss bi dat Bundsutglieksamt.[4]
Hoffmann weer Maat von’n Lands- un Bundsvörstand von de Middelstandsvereenigung un von 1980 bet 1990 Maat von’n Landsvörstand von de CDU in Neddersassen.[5]
Na’n Dood von ehren Mann 1996 is se 1998 ümtagen na Wasra. 2008 is se in en Seniorenstift tagen.[2] Hoffmann is 2012 doodbleven.
Literatur
ännern- Uta Albeshausen: Im Anfang war die Tat... Biografische Erinnerungen der Politikerin Ingeborg Hoffmann. 2013, ISBN 978-3-8423-4309-2
Footnoten
ännern- ↑ Das Parlament, Ausgabe Nummer 22 bis 24 vom 29. Mai 2012, Seite 14. (online)
- ↑ a b c d e f g h i Uta Albeshausen: Im Anfang war die Tat... Biografische Erinnerungen der Politikerin Ingeborg Hoffmann. 2013, ISBN 978-3-8423-4309-2, Sied 92ff
- ↑ Frühere Abgeordnete des Wahlkreises Nienburg-Schaumberg
- ↑ Rudolf Vierhaus: Biographisches Handbuch der Mitglieder des Deutschen Bundestages 1949-2002. 2002, Sied 355
- ↑ Naroop op de Websteed von’n CDU-Kreisverband Heidkreis, afropen an’n 2. Juni 2012.