Ingeborg Wurster

Ingeborg Marianne Wurster (* 12. August 1931 in Heidelbarg; † 6. Januar 1999 in Mainz) weer en düütsche Journalistin un Feernsehmoderatersche.

Leven un Wark

Wurster is in Heidelbarg boren. Dor hett se na’n Krieg ok ehr Abitur maakt. In Nürnbarg hett se en Utbilln as Toontechnikersche maakt. In dissen Beroop hett se denn vun 1953 bit 1957 bi Radio Bremen arbeit. De Utbilln as Journalistin hett se nienich maakt, man se müss op egen Insichten torüchgriepen, wat se bi ehr Arbeit as Toontechnikersche bito vun de journalistische Arbeit mitkregen hett.

Vun 1957 bit 1960 hett se to’n eersten mol as Schrieversche un Sprekersche för den WDR arbeit. Korttietig weer se ok noch mol bi Radio Bremen un bi’n SFB insett, güng denn 1962 aver na’t ZDF na Mainz. Dor weer se toeerst tostännig för de Produkschoon vun de Reeg Zur Person, in de Günter Gaus prominente Lüüd befragen de. 1966 is se as Utlandskorrespondentin na Washington D.C., 1970 na New York un 1975 denn na Brüssel sennt worrn.

1979 keem se na Mainz torüch, woneem se as eerste Fro Moderatersche vun dat Heute-Journal worrn is, dat 1978 grünnt weer. Dordör is se vele Feernsehtokiekers in Düütschland bekannt worrn.

Weblenken

• Ingeborg Wurster in de Internet Movie Database (engelsch)
• Das Heute-Journal von Kronzucker bis Kleber (hoochdüütsch)
• Ingeborg Wurster bi www.munzinger.de (hoochdüütsch)