Jacob Peyt

Jacob Peyt weer blangen Nicolaas Zannekin de Anföhrer vun den Opstand vun de fre’en Buern an de flaamsche Küst. He schall ut Hondschoote oder na annere Quellen ut Sint-Winoksbergen stammen.

In’n Anloop op de Slacht bi Kassel 1328 probeer he vun 1323 an, faken mit harte Middels, de Karkenlüüd dorvun to övertügen dat Interdikt, dat de Paapst Johannes XXII. utropen harr, nich natokamen.

Jean Laing, Dekan vun Sint-Winoksbergen, reep de Karkenlüüd vun sien Amtsrebeet tohoop, dat se nich vun em affallt un üm se op ehr Plichten hentowiesen. Peyt versammel siene Folgers üm Laing fangen to nehmen, aver de kunn wegwutschen. Peyt sett dorop de versammelten Karkenlüüd ünner Druck, dat se dat Interdikt nich folgen.

He hett denn dat Betahlen vun den Karkenteihnten un Renten verbaden. Jeedeen, de dat wagen dei, mit den Klerus tosamentoarbeiden, muss en Straaf betahlen.

He is in Hondschoote twischen den 25. Juli un 29. August 1327 ümbrocht worrn. He is in Coudekerke begraven worrn. Brugge leet en Ünnersöken dörföhren, na de Deders vun den Moord, en Bewies, dat se in em en ehrvull Mann sehn.

Na de Nedderlaag vun de Kerelslegers to Kassel leet de Bischop vun Terwaan sien Liek wedder utkuhlen un to Asch maken.