Jan Cux

Jan Cux is dat Maskottchen von de Stadt Cuxhoben. Jan Cux is’n blonnen Jung mit blauen Troyer un Pudelmütz.

Jan Cux utdacht hett sik Kurt Mollenhauer. Al in de Johren 1950 weer Jan Cux de lütte Mann för’n Wederbericht in de Cuxhavener Presse, hett bi Schietweder de Snuut scheef trucken un bi fein Sünnweder fröhlich grient. 1971 denn wull de Müllaffuhr sik ok en Maskottchen geven. Mollenhauer hett Jan Cux denn en beten opmöbelt un in’n Januar 1972 weer he denn in Cuxhoben op de Wagens von de Müllaffuhr to sehn. Dor keem de Matroos good an un an’n 13. März 1973 is he denn offiziell von de Kurverwaltung as Stadtmaskottchen utwählt worrn. Vörher harrn se mit’n lüttje Nix för de Stadt worven. In’n Juli 1973 hett he denn ok noch en Deern bi’e Sied kregen, Cuxi, de en rode Jack un Büx an hett un ehr blond Hoor to twee dicke Zöpp fluchten hett. Von 1975 bet 2000 hett dat denn ok noch en echten Jan Cux ut Fleesch un Blood geven, de so för de Stadt worven hett. Dat hett toeerst Uwe Beythien un later Torsten Brüggemann, Kai Einfeld, Jörg Itjen, Dirk Stolze, Mark Stolze, Lars Janßen, Philipp Gnam un Jan Enderstein daan.