Jan II. von Slamersdörp

Jan II. von Slamersdörp († 20. Dezember 1421) weer von 1406 bet 1420 Arzbischop von Bremen.

He stamm ut holsteenschen Adel un kummt 1373 as Baas von de Bremer Doomschool toeerst in de Oorkunnen vör. Von 1381 bet 1406 weer he Archdiaken von Hadeln un Wusten. 1386 hett de Bremer Raad de Borg un Vaagdie Langwedel an Jan verpannt. He harr de Borg bet 1395 un hett tominnst in de eersten Johren dat Amt ok sülvs utöövt.

1406 is he as Arzbischop von Bremen wählt worrn. He hett as Arzbischop versöcht, de verpannten Stiftsgöder weddertokriegen un hett de Finanzen von dat Stift in’e Reeg bröcht. Dorto hett he ok de Rechten von dat Stift opschrieven laten, wat de Jördeböker sünd. De weren later en Grundlaag för Jan III. Roden sien Vörder Register.

He hett ok versöcht, in Geestmünn en Borg gegen de Wuster antoleggen. Dat hett aver nich klappt, dor sünd de Wuster un de Stadt Bremen gegen angahn.

Vörgänger	Amt	Nafolger
Otto II. von Bruunswiek-Lümborg	Arzbischop von Hamborg-Bremen 1406–1421	Klaas von Ollnborg-Demost