Japaansch Resensalamander

Oort vun Salamanders ut de Familie Resensalamanders

Japaansche Resensalamanders (Andrias japonicus) sünd en Oort vun Salamanders ut de Familie Resensalamanders. De fröhere Naam vun ehr Geslecht weer Megalobatrachus.

Japaansch Resensalamander
Systematik
Afdeel: Chordadeerter (Chordata)
Klass: Amphibien (Amphibia)
Ornen: Salamanders (Caudata)
Familie: Resensalamanders (Cryptobranchidae)
Geslecht: Andrias
Wetenschoplich Naam
Andrias japonicus
Andrias japonicus

De Japaansche Resensalamander is de längste Oort vun Amphibien op de Eer, he warrt mehrst een Meter, mitünner ok bet annerthalv Meter lang. Japaansche Resensalamanders wasst ehren Leevdag wieder un köönt recht oolt warrn. En fungen Exemplar dat üm 1830 na de Nedderlannen keem, leev eerst teihn Johren in dat Rieksmuseum vun de Naturhistorie un later in den Zoo Artis in Amsterdam, wo dat Deert 1881 in en Öller vun 51 bet 55 Johren doodbleev.

Se leevt in lütte, kole Bargbeken un Strööm, de gau fleet. Ut dat Water kaamt se kuum rut, gröttere Deerter sünd faken gor nich mehr in de Laag an Land to gahn, wiel se to swoor för ehr korte un dicke Been sünd. Ehr Huut is griesbruun bet swart mit Placken un en helleren Buuk un se hebbt op ehren platten Kopp wrattige Bulen. De Steert hett en Kiel, dat he sik beter dör’t Water bewegen kann.

De Japaanschen Resensalamanders sünd dör de Oordenschutz-Konventschoon vun Washington schuult. In Japan warrt se aver as traditionelle Medizin un Delikatess ansehn un hebbt ok Problemen mit Ümweltversmudden, so dat se wieder bedroht sünd.

Kiek ok bi ännern