Jaroslav Drobný (Tennisspeler)

Jaroslav Drobný (* 12. Oktober 1921 in Prag; † 13. September 2001 in London) weer en tschechoslowaaksch Tennis- un Ieshockeyspeler, de later ok Tennis för Ägypten speelt hett.

Karriere

Jaroslav Drobný speel in' Winter Ieshockey un in' Sömmer Tennis; beid Sportaarten hett he up Weltklasseniveau bedreeven.

So wurr Drobný in' Ieshockey mit de tschechoslowaaksch Natschonalmannschap 1947 Weltmeester un wunn 1948 mit de Mannschap de Sülvermedaille bi de Olympisch Winterspelen.

In Wimbledon fung 1938 sien Loopbahn as Tennisspeler an. Ünnerbraken dör den Tweeten Weltkrieg kehr he 1946 up de Tennisbühne torüch un reck in dit Johr dat Finale in Roland Garros. Af 1949 hett he sück blots noch up den Tennissport konzentreert un stunn to’n eersten Mal in dat Finale vun Wimbledon, wo he aber den Amerikaner Ted Schroeder in 5 Satzen ünnerleegen weer. In dat sülvig Johr hett he beslooten, nich mehr in de Tschechoslowakei torüchtokehren; he is sietdem för Ägypten]] start.

As bit hüüd (2016) eenzig Ägypter wunn he 1954 dat Turnier vun Wimbledon gegen Ken Rosewall, nahdem he twee Johr vörher in’t Finale gegen Frank Sedgman verloren harr. Bi de franzöösch Meesterschapen weer Drobný spoodriker un wunn dat Turnier 1951 (gegen Eric Sturgess) un 1952 (gegen Frank Sedgman) in‘ Eenzel, 1948 in‘ Düppel (mit Lennart Bergelin) un in‘ Mixed (gemeensam mit Patricia Canning Todd). 1954 truck he denn nah London, wo he 2001 storven is.

In dat Johr 1983 wurr he in de Hall of Fame vun den Tennissport upnommen.