Jeverland

Dat Jeverland is de Landstreek, de vandag de noordelke Deel van de Landkreis Freesland utmaakt. In dat 15. Johrhunnert hett sük dat Jeverland ut de oll Heerskupp Jever billdt. De Heerskupp was e Tosammensluut van dat Wangerland, grote Delen van Östringen un dat rüstringer Banter Veerdel. Wat vandag de Stadt Willemshaven is, höörde fröher ok na dat Jeverland, man vandag word dat daar neet mehr torekend. Nettso is dat mit de bei vörmalsk sülvstannig Karkspelen Heppens un Neeiende, de vandag ok to Willemshaven hören.

Fröher wurr meestieds mit Buureei Geld verdeent. Hannel dreven de Jeverlanners over de Sielhafens Hooksiel, Rüstringersiel un Mariensiel. Midden in dat Jeverland lagg de Heerskupp Kniphusen, de to manche Tieden sülvstannig was. Ok dat hört vandag to d' gröttste Deel na Willemshaven.

Historje

Mehrmaals wessel dat Jeverland siene Herren. Dat is aftolesen an disse Översicht:

• 1359 - 1517 Na un na enigen Edo Wiemken un sien Nakomers grote Delen van dat Wangerland, Östringen un Rüstringen unner hör Heerskupp; de Freeske Freeheid is vörbi
• 1517 - 1531 De Grafen van Oostfreesland hebben en groot Infloot, se bünd de facto Heern van dat Jeverland
• 1531 - 1575 De Tied van Maria van Jever; smitt de Grafen ruut un verhinnert, dat dat Jeverland achter hör Dood an de Grafen van Oostfreesland kummt
• 1575 - 1667 Grafen von Ollnborg
• 1667 - 1793 Försten von Anhalt-Zerbst
• 1793 - 1806 de russische Kaiserin Katharina ut dat Huus Anhalt-Zerbst arvt dat Jeverland
• 1807 - 1810 hollandsch unner Ludwig Bonaparte (Napoleons Broder)
• 1810 - 1813 franzöösch unner Napoleon
• 1813 - 1818 russisch unner Zar Alexander I., de dat Jeverland an Ollnborg afgeev
• 1818 - 1918 Hertöge un Groothertöge von Ollnborg
• 1918 - 1946 Deel von den Freestaat Ollnborg
• 1946 - Deel von Neddersassen

Ok vandag hören mennig Jeverlanner dat neet geern, wenn se as Oostfresen betekend worden, umdat dat Jeverland nooit würkelk to de Graafskupp Oostfreesland hört hett. Man nett as de Oostfresen bünd de Jeverlannes "oostelke Fresen" un so hett sük in neje Tied de Begreep Oost-Fresen ruutbilldt, de för all Fresen in de Kuntrei tüsken Eems un Weser bruukt worden kann.