Johann Cornies

Johann Cornies (* 20. Juni 1789 in Bärwalde; † 13. März 1848 in Orloff) weer en Föhrer vun de mennonitschen Siedlers in Russland in de Kolonie Molotschna.

Cornies is 1789 in Bärwalde in Oostpreußen as öllsten vun veer Söhn vun Johann un Aganetha Cornies boren. 1804 is de Familie na Molotschna trocken. Dor hett he Agnes Klassen heiraadt, mit de he een Söhn un een Dochter harr.

Cornies dee toeerst as Knecht bi en Möller arbeiden un harr en Hannel mit landweertschopliche Produkten. 1811 hett he sik in Orloff dallaten. He hett denn anfungen, sik dor mit to befaten, wo sik de Bueree in de Ümgegend verbetern lett. 1830 hett he en landweertschoplichen Vereen grünnt, de sien Sitt in Odessa harr un weer denn ok de eerste Vörsitter vun dissen Vereen. He hett Musterwirtschaften grünnt un de aktuellsten Metoden in de Landweertschop an de Kolonisten wiedergeven. Ackerbo, Veehtucht, Goornbo, Forstwesen un Anbo vun Wien kemen so in de Kolonie good vöran. De Mennoniten hebbt op disse Wies bi’t Wirtschaften ok mehr Spood hebbt as de evangeelschen un kathoolschen Siedlers, de in annere Rebeden vun Süüdrussland siedeln deen.

Ene vun de opbooten Musterwirtschaften hett em ok sülvst tohöört. He harr mehr as 10.000 Hektar Land, en grote Rinnertucht, mehr as 8000 Merinoschaap un 400 Peer.

Ok för’t (hoochdüütsche) Schoolwesen hett he veel daan. He hett dor för sorgt, dat mennonitsche Lehrers utbillt warrt un en eenheitliche Verwalten för de Scholen opboot. De Schoolmeesters müssen nu en Lehrerexamen maken, wat de Gööd vun de Schoolbildung verbetern dee. Ok en allgemene Schoolplicht vun söss Johr geev dat nu, wat annerwegens in Russland eerst mit de Oktoberrevolutschoon meist 70 Johr na sien Dood keem. Ok de Lehr- un Stünnenplään hett he reformeert un eenheitlicher maakt.

De russ’sche Regerung ünner Nikolaus I. hett sien Wark würdigt, dat se em to en korrespondeerend Maat vun dats Gelehrtenkomitee vun dat Rieksministerium in St. Petersborg maakt hebbt.