John Lennon Talent Award

De John Lennon Talent Award is en Födderpries för Newcomer in de Rock- un Popmusik.

Den John Lennon Talent Award (JLTA) gifft dat siet 1991. Veranstalt und vergeven warrt de all twee Johren in’n Rahmen vun de Kulturföddern dör de Itzhoer Versicherungen mit Verlööf vun Yoko Ono, de Weetfro vun John Lennon. Dat Kunzept is vun Klaus Voormann för de Versicherung utklamüstert worrn.

De Födderpries richt sik an junge Muskanten ut dat hele düütsche Bundsrebeet. Bewarven künnt se sik mit egene Leder. De Utwahl warrt vun en Fackjury vörnahmen, de sik ut Produzenten, Muskanten, Fackjournalisten un annere tosamensett. De utwählten föffteihn Priesdrägergruppen oder -solisten nehmt tosamen an en Workshop-Wekenenn deel, de vun Praktikers ut Musik un Ünnerholen maakt waart. Vör allen warrt dorbi künstlerische, handwarkliche, rechtliche un weertschoppliche Saken behannelt. Afrunnt warrt de Föddern, de höchsten 24 Maanden duert, dör individuelle Workshop-Anbotten, as ok Beraden vun de enkelten Deelnehmers.

Dat offizielle Enn vun den John Lennon Talent Award is en apentlichen Wettstriet. De Deelnehmers wiest sik vör wesseln Fackjurys in verscheden Städer, de opletzt den Winner vun den JLTA bestimmen doot. De Pries för den Winner is en sünnere Gitarr.

De Itzehoer Versicherungen sünd mit den Düütschen Kulturfödderpries 2009 uttekent worrn.

Priesdrägers bit nu

• 1991: Monroes
• 1993: Paradocs
• 1995: Niños Con Bombas un Suborange Frequency.
• 1997: Motorsheep
• 1999: Pussybox
• 2001: Siamoon
• 2003/04: Schrottfisch ut Berlin
• 2005/06: Radiopilot ut Berlin
• 2008/09: Ludwig van ut Flensborg
• 2010/11: Shenaniganz ut Bayern

Weblenken

• Websteed vun’n John Lennon Talent Award