John Robert Vane
John Robert Vane (* 29. März 1927 in Tardebigg, Worcestershire; † 19. November 2004 in Farnborough, London) weer en britisch Biochemiker un Medizin-Nobelpriesdräger. He weer de Opdecker vun de Funktschoonswies vun Aspirin.
Leven
ännernSien Vader Maurice Vane weer Söhn vun russisch Immigranten; sien Moder Frances Vane stamm ut en britisch Buernfamilie. He gung up de King Edward XIV Highschool in Birmingham. Mit twalf Johren kreeg he vun sien Öllern en Chemiebaukasten un fung an to experimenteeren. Af 1944 studeer he an de Universität von Birmingham. Dor weer he tonächst nich dormit tofree, dat he dor kien Mögelkeiten to’n Experimenteeren harr. Af 1946 hett he an de University of Oxford Pharmakologie bi Harold Burn studeert, wo he nah en Tüschentiet mit Lehrtätigkeit an de Universität Sheffield 1953 promoveert bi Geoffrey Dawes wurr. Af 1953 weer he Assistant Professor an de Yale University. Dornah lehr he af 1955 an dat Institute for Basic Medical Science vun de Universität London in dat Royal College of Surgeons of England, tonächst as Senior Lecturer, denn as Reader un sluutend as Perfesser för experimentelle Pharmakologie. 1973 wurr he Baas vun de Forschung bi de Wellcome Foundation. Af 1985 weer he an dat William Harvey Research Institute an’t Medical College vun dat St. Bartolomew Hospital in London.
Den Medizin-Nobelpries kreeg he 1982 tosommen mit Sune Karl Bergström un Bengt Ingemar Samuelsson för Opdecken in Henblick up Prostaglandine un verwandt biologisch aktive Substanzen. Enn’ vun de 1960er un Anfang vun de 1970er Johren, hett he rutfunnen, dat Aspirin över dat Ünnerdrücken vun de Prostaglandin Synthese warken deiht. Dorbi hett he ok mit den brasiliaansch Pharmakoloog Sérgio Henrique Ferreira tosommen arbeit, ok up dat Rebeet vun de fröh Entwicklung vun ACE-Hemmern (wat to de Entwicklung vun Captopril 1974 bi Squibb führ).
Utteknungen
ännern1977 wurr he mit den Albert Lasker Award for Basic Medical Research un 1989 mit de Royal Medal vun de Royal Society uttekent, deren Fellow he siet 1974 weer. 1984 wurr he adelt. He weer utwärtig Liddmaat vun de Poolsch Akademie vun de Wetenschapen, de Königlich Nedderlannsch Akademie vun de Wetenschapen un de National Academy of Sciences (1983). He harr mehrer Ehrendoktertitel (Mount Sinai Hospital Medical School in New York, Krakau, Paris, Aberdeen). 1980 kreeg he den Peter Debye Pries un 1981 de Dale-Medaille.
Vane weer verheiraadt un harr twee Döchter.