John Ssebaana Kizito

John Ssebaana Kizito (* 1934 in’n Luwero) is en ugandschen Politiker.

He weer op de Ndejje Junior School un op dat King’s College in Budo un hett later an de Makerere-Universität sien Bchelor in Weertschop maakt un an de Universität vun Oregon Weertschopswetenschoppen studeert un dor 1963 sien Master maakt. Al mit 30 Johr weer he Afornter in dat Parlament vun de Oostafrikaansche Union. 1965 bet 1980 hett he as Vörsitter vun de Sozialversekerung vun Uganda arbeidt un weer vun 1966 bet 1970 toglieks Baas vun de Zentralbank vun Uganda. 1980 bet 1985 weer he Parlamentsafornten för Kampala West un ünner Museveni 1986 bet 1987 Minister för regional Kooperation. Denn weer he bet 1989 Minister för Kooperativen un Vermarktung un 1989 bet 1991 Minister för Wahnungsbo un Stadtplanung. 1999 hett he sik mit 55,7 % gegen Wasswa Biriggwa dörsett (42,7 %) un is to’n Börgermeester vun de ugandsche Hööftstadt Kampala wählt worrn.

Ssebaana is siet November 2005 Vörsitter vun de Demokraatsche Partei vun Uganda. Vörher is he al över 30 Johr Schatzmeester vun de Partei wesen. Nadem he as Vörsitter wählt worrn is, is he nich wedder to de Wahl as Börgermeester vun Kampala antreden un Haji Nasser Ntege Ssebagala hett denn de Wahl wunnen. Bi de Präsidentenwahlen an’n 23. Februar 2006 weer he de Kandidat vun de Demokraatsche Partei. Bi de Wahlen hett he aver blot 1,58 % vun de Stimmen kregen.

Ssebaana is verheiraadt mit Christine Kizito un hett mit ehr veer Döchter un twee Söhn.