John Walker (Utfinner)
John Walker (* 19. Mai 1781 in Stockton-on-Tees, England; † 1. Mai 1859 in Stockton-on-Tees) weer en engelsch Aftheker. He hett 1826 de Rietsticken utfunnen.
Walker funn tofälligerwies rut, dat sück en Mischung ut Antimon(III)-sulfid un Kaliumchlorat entzünden de, wenn man dat över en ruug Böverflach rieben de. He hett denn de Rietsticken sowiet wieder entwickelt, dat man se verkoopen kunn un af 1827 hett he de in Tinndösen to hunnert Stück verköfft.
He hett sien Erfindung aber nich patenteeren laten, un so hebbt hüm tallriek Nahmakers över kört oder lang vun’n Markt drängt. De bekannst dorvan weer Samuel Jones ut London mit sien Lucifers. .
John Walker harr lokal en gooden Roop as Botaniker, he hett en Interess för Mineralogie entwickelt un hett ok völ Tiet mit chemischen Experimenten verbrocht. Walker hett nie heiraadt un leev mit sien Nichte tosommen. He weer bekannt för sien Kleidungsstil; he droog meestens en grooten Biberhoot, en witten Krawatte, grau Strümp, graubruun Kneebüxen un en bruun Schoßrock. He is 1857 in Stockton-on-Tees storven un wurr in dat nah bi gelegen Norton-on-Tees begraben.