Hauptmenü öffnen

Josef Steinhübl (* 26. März 1902 in Deutsch-Proben; † 18. April 1984 in Höfen) weer en Preester un Politiker bi de Düütschen in de Slowakei.

Steinhübl is 1902 in Deutsch-Proben as Söhn vun Anton un Elisabeth Steinhübl boren un is 1925 to’n röömsch-kathoolschen Preester wieht worrn. He weer denn 1925 bet 1928 Kaplan in Johannesberg un 1928 bet 1932 in Slovenskä Lupca. Steinhübl sülvst schillert dat so, dat he na Slovenskä Lupca keem, as Straaf, dat he dat waagt harr, in Johannesberg en Andrag to stellen, dat de Theatergrupp en Stück op Düütsch opföhren dröff. Vun 1932 bet 1936 weer he Pastoor in Münnichwies, denn bet 1940 in Glaserhau un vun 1940 bet 1945 in Krickerhau. Steinhübl hett 1934 mit Jakob Bauer un Johann Zeisel den eersten Karpatendüütschen Katholikendag in Deutsch-Proben tohoopbröcht, to den 15.000 Lüüd ut dat ganze Hauerland kamen sünd.

He wull gegen de Kommunisten gegenan gahn, de ünner de Hauerlänner jümmer mehr Toloop kregen un güng dorüm in de Politik. He hett sik de Karpatendüütsche Partei anslaten. 1935 is he as eenzigen Düütschen in’n Landschopsdag vun Turz-St. Martin kamen un weer vun 1938 af an ok in’t slowaaksche Parlament. 1945 hebbt se em in Asch fastnahmen un 1946 in Pressborg to’n Dood veroordeelt. Dat Oordeel is 1948 to levenslange Haft ännert worrn un 1955 keem he free un se hebbt em na West-Düütschland afschaven. In Stuttgart weer he bi de Caritasflüchtlingshilfe un hett 1956 den Helpsbund karpatendüütsche Katholiken grünnt. Vun 1956 bet 1969 weer he Pastoor vun de St.-Fidelisgemeen in Stuttgart.

WarkenÄnnern

  • Mein Leben. Hilfsbund Karpatendeutscher Katholiken, Stuttgart 1975