Julio María Sanguinetti Coirolo
Julio María Sanguinetti Coirolo (* 6. Januar 1936 in Montevideo) weer van 1. März 1985 bit 1. März 1990 as ok van 1. März 1995 bit 1. März 2000 Präsident vun Uruguay.
Sanguinetti hett Jura un Sozialwetenschapen an de Universidad de la República studeert. Nahdem he sien Afsluss 1961 makt hett, hett he versöcht, as Jurist un Journalist to arbeiten. 1963 wurr he as natschonaler Afordneter vun den Bezirk Montevideo nomineert. 1966 weer he stellvertreden Herutgever un Spreker vun dat Projekt uvun de Verfaatensreform un 1967 wurr he Liddmaat vun den Raat vun den Präsidenten för Angelegenheiten, de mit de Organisatschoon vun de Amerikaansch Staaten (OAS) verbunnen waren. 1969 wurr Sanguinetti Minister för Industrie un Hannel, 1972 Minister för Kultur un Bildung.
1973 hett de Militärregeeren de Verfaaten buten Kraft sett un Sanguinetti hett sien Positschoonen in de Regeeren un in’ Kongress verloren. Bit 1976 kunn he sück noch as Präsident vun de Natschonale Kommission vun de bildenden Künste hollen, denn het man hüm dorvan ok entbunnen. Hüm wurr ok verboten sück politisch to betätigen. In de folgend Johren hett sück Sanguinetti weer mit den Journalismus befaat un nehm en kritisch Positschoon to de Regeeren in. He hett denn kulturelle un sportliche Tätigkeiten as Präsident vun dat Regionalzentrum vun de UNESCO un de Kampagne "Förderung vun dat Book" in Latienamerika (1975–1984) fördert un wurr Viezpräsident vun den Footballvereen Peñarol.
An’ 29. Juni 1981 wurrn hüm sien politischen Rechte un Ämter torüchgeven. He führ de Delegatschoon in de Parteiverhanneln mit dat Militär an, mit dat Teel, en freedlichen Övergang to de Demokratie to finnen. Mit dat Ünnerteken vun den Marine-Pakt an’ 3. August 1984 wurrn de Verhanneln spoodriek afslooten.
1983 wurr Sanguinetti Generalsekretär vun den Exekutivutschuss un in’ August 1984 kreeg he de Mehrheit as Kandidat för de Präsidentschapswahlen in dat nächst Johr. Dat weern de eersten free Wahlen un de twalfjohrig Dwangsherrschap vun dat Militär gung to Enn’. Sanguinetti wunn de Wahlen 1984 un hett an’ März 1985 sien fievjohrig Amtstied antreden.
Wiels disse Amtstiet hett he bannig uppasst, man jo nich de Minschenrechte to verletzen un hett entsprekend Gesetten dörsett. Dormit hett he sück en Bispeel an Argentinien nommen, wo dat ok so makt wurrn weer. In en Versöök, de natschonaal Versöhnung wat lichter to maken, hett he dat Law of National Pacification van 1985 fördert, as dessen direkt Folg 267 Guerilleros amnesteert wurrn. In de Butenpolitik hett he de Beziehungen mit Spanien weer up den Weg brocht un hett ok de Kuntakte mit Brasilien un Argentinien weer herstellt. An 1. März 1990 hett Sanguinetti sien Präsidentenamt an Luis Alberto Lacalle Herrera afrtreden, de de vörangahn Wahl in November 1989 wunnen harr.
1994 wurr Sanguinetti weer vun sien Partei as Präsidentschapskandidat upstellt un wunnen denn ok de Wahlen an’ 27. November 1994. De Präsidentschap hett he an’ 1. März 1995 antreden. He weer dormit de darte Präsident in de Historie vun Uruguay, de wedder wählt wurrn is. An’ 1. März 2000 hett he de Präsidentschaft denn an sien Nahfolger Jorge Batlle Ibáñez aftreden.
Neben sien politischen Aktivitäten weer (un is to’n Deel noch) Sanguinetti Kolumnist vun de spaansch Nahrichtenagentur EFE un vun dat Daagblatt El País, organiseer Seminare an de Universität Complutense in Madrid un hull Vörlesungen in de Sömmerkursen vun de Internatschonale Universität Menéndez un de Universität Pelayo vun Santander. Siet 1990 is he ok Präsident vun dat PAX-Institut.
För sien Tätigkeiten wurr he mit völ Ehrungen uttekent as: Ehrendokterwürden, Ehrenliddmaatschap vun dat Italieensch Groot Krüüz un de franzöösch Ehrenlegion.
Sanguinetti is verheiraadt un hett twee Kinner.
| Vörgänger | Amt | Nafolger |
| Luis Alberto Lacalle Herrera | Präsident vun Uruguay 1. März 1995 - 1. März 2000 |
Jorge Batlle Ibáñez |
| Vörgänger | Amt | Nafolger |
| Rafael Addiego Bruno | Präsident vun Uruguay 1. März 1985 - 1. März 1990 |
Luis Alberto Lacalle Herrera |
Weblenken
ännern
Julio María Sanguinetti Coirolo. Mehr Biller, Videos oder Audiodateien to’t Thema gifft dat bi Wikimedia Commons.