Julius Yeshu Çiçek

Mor Julius Yeshu Çiçek (* 25. März 1942 in Kafro 'Elayto; † 29. Oktober 2005 in Düsseldörp) weer de eerste Arzbischop van de Syyrsch-orthodoxe Kark van Antiochien in Middeleuropa.

Çiçek is 1942 as Söhn van’n syyrsch-orthodoxen Preester Barsaumo un sien Fro Sayde, en Bath Qyomo, in dat Dörp Kafro 'Elayto in de Tur-Abdin-Bargen boren. He dee van en lange Reeg van Preesters afstammen. Al mit negen Johr is he vanaf Oktober 1951 op dat Seminar van dat Klooster Deir Za'faran utbillt worrn. Dor is he an’n 15. Februar 1954 to’n Lektor wieht worrn. Bi’n Direkter van dat Seminar, Gabriel Allaf, hett he Karkenmusik un Araabsch studeert un bi Abrohom Be-Hacco Aksan Syyrsch. Van 1955 af an hett he denn bi Arzbischop Philoxenos Yuhannon Dolabani arbeidt un van 1957 af een Johr sien Vadder bi de Arbeit in de Gemeen in Barence hulpen. An’n 4. Februar 1958 hett Dolabani em denn to’n Subdiakon wieht un an’n 17. Dezember 1958 is he denn in Mardin to’n Diakon för dat Bisdom un Klooster Mor Kuryakos wieht worrn. In de Tied 1959 un 1960 hett he welk Reisen dör de Regionen Bitlis un Seert maakt, wo dat van oold her vele armeensche Christen geven harr, de na de törkschen Massaker an de Armeniers nu al meist 40 Johr keen geistliche Betreuung mehr harrn. Op disse Reis hett he Sakramente utdeelt, Seelsorf geven un Minschen döfft un verheiraadt. Bld dorop is he denn Mönk worrn un in dat Klooster Mor Gabriel intreden. An’n 22. Mai 1960 is he van Bischop Iwannis Aphrem Bilgiç to’n Mönk wieht worrn. Na’n Dood van Abt Sabo Günes is he al mit 20 an’n 12. Dezember 1962 Abt van sien Klooster worrn. He dee dat Klooster nu wedder beleven, hett de Gebüden wedder nee maakt, en Preesterseminar grünnt, hett dat Klooster Stroom bröcht un en nee Straat boon laten. Op twee Reisen na Syrien un Europa hett he dor Geld för sammelt. He müss 1967 bet 1969 sien Wehrdeenst för de Törkie maken un is an’n 14. Dezember 1969 dör Bilgiç to’n Preester wieht worrn. 1973 wull he in’n Libanon en Druckpress köpen, hett denn aver Arger mit’n törkschen Staat kregen, de en Druckpress as Mööglichkeit Unroh to stiften anseeg. Denn hett he van Patriarch Ignatius Jakob III. opmal den Opdrag kregen, bi de syyrsche Diaspora in’n Westen Seelsorg to drieven. He keem 1974 na Düütschland un hett Düütsch lehrt un weer denn en Tied in de USA un hett dor engelsch lehrt. He hett sik sied 1976 üm de syyrsche Gemeen in Detroit kümmert. De Patriarch hett em denn an’n 5. Mai 1977 as Patriarchalvikar för Europa insett un Çiçek keem in de Nedderlannen, na Hengel. Op de Synood an’n 18. Oktober 1977 in Damaskus hebbt se denn beslaten, dat in Europa twee Arzbisdömer opricht warrt. An’n 24. Juni 1979 hett em denn Patriarch Ignatius Jakob III. in de kathoolsche St. Ludgeruskerk in Hengel to’n Bischop van Mitteleuropa un de Benelux-Länner wieht. Ünner sien Leid vanaf 1979 hett de syyrsche Kark bi 51 Karken un dree Kloosters in sien Bisdom in de europääsche Diaspora apen maakt. Çiçek hett 131 Böker rutbröcht, van de en poor hunnertdusend druckt worrn sünd, veel dorvan op Aramääsch. 1978 hett he ok de Tiedschrift Kolo Suryoyo („Stimm van de Syrers“) begrünnt. He hett dor veel för daan, dat de syyrsche Kark in de europääschen Länner as egene Kark goodkennt warrt. Ok in de Arbeidsgemeenschop van de christlichen Karken hett he de syyrsche Kark mit inbröcht un in verschedene Scholen in Europa syyrschen Religions- un Spraakünnerricht mööglich maakt. Aver ok den Bo van ne’e Preesterseminars in Indien un Syrien hett he mit Geld ut de Dispora ünnerstütt. In de Johren 1990 weer he ok en Tied lang Bischop för dat vakante Bisdom Hillig Land un Jordanien. För sien besünnere Leistungen för de syyrsche Kark hett em Patriarch Ignatius Zakka I. Iwas 1992 den Ehrentitel Mor Jakob Burd'ono van dat 20. Johrhunnert geven (Jakob Burd'ono harr de syyrsche Kark in dat 6. Johrhunnert wedder nee opricht, nadem se na dat Konzil van Chalkedon van de annern Konzilianten meist ganz uteneenslaan worrn weer).

He is 2005 in Düsseldörp op de Dörreis van dat Klooster St. Ephrem de Syrier in de Glaan na en Kongress in de Swiez doodbleven. He is an’n 5. November 2005 na en Mess in de Mariakark in datt Mausoleum van dat St.-Ephrem-Klooster in de Glaan bisett worrn.

Na sien Dood is dat Arzbisdom opdeelt worrn in de Arzbisdömer Nedderlannen, Belgien/Frankriek/Luxemborg, Swiez/Öösterriek un Düütschland.

Weblenken

Julius Yeshu Çiçek. Mehr Biller, Videos oder Audiodateien to’t Thema gifft dat bi Wikimedia Commons.

• Indrag to de Person in dat Biograafsch-Bibliograafsch Karkenlexikon (hoochdüütsch)
• In Memoriam Mor Julius Yeshu Çiçek (hoochdüütsch)