Karl Hugo Strunz

Karl Hugo Strunz, kort: Hugo Strunz, (* 24. Februar 1910 in Weiden in de Böverpalz; † 19. April 2006 in Ünnerwössen) weer en düütschen Mineraloog, Professer un Entwickler vun de moderne Indeelen un Klassifikatschoon vun de Mineralen.

Utbilln un Lehr

Na Afsluss vun sien Schooltiet in Regensborg hett Hugo Strunz 1929 in München en Studium vun de Naturwetenschoppen opnahmen mit Sworpunkt op de Mineralogie. 1933 kreeg he sien Promotschoon to’n Dokter vun de Philosophie an de Ludwig-Maximilians-Universität München. Twee Johr later is he an de TU München ok Dr. vun de technischen Wetenschoppen worrn.

1937 keem Strunz an dat Mineralogsche Museum vun Berlin un is dor Assistent vun Paul Ramdohr (1890-1985) worrn. 1938 hett he denn habiliteert. In de Tiet vun 1939 bit to’n End vun’n Tweeten Weltkrieg hett he as Dozent för Mineralogie un Petrographie an de Friedrich-Wilhelm-Universität lehrt. Dorna hett he an de Philosophsch-Theologschen Hoochschool in Regensborg Mineralogie lehrt. Dor hett he en Mineraloogsch-Geologisch Institut grünnt, dat later to’t Staatliche Forschungsintitut för anwennte Mineralogie utwiet worrn is.

Strunz is 1951 torüch gahn na Berlin, wo he an de TU Berlin den Lehrstohl för Mineralogie un Petrographie kregen hett. In wenige Johren hett he ok dor en Mineraloogsch Insitut op de Benen stellt, woneem he bit to sien Emeriteeren 1978 bleven is. He hett in disse Tiet mehr as 140 Publikatschonen tostannen brocht.

Vun 1958 bit 1970 harr Karl Hugo Strunz den Vörseet vun de Mineral Data Commission vun de International Mineralogical Association (IMA). Na sien Emereiteeren weer Strunz Kustos vun’t Mineralogische Museum in sien Heimat.

Sien Leistungen

KarlHugo Strunz hett op de Grundlaag vun jemehr cheemsch Tohopensetten un Kristallstruktur en Mineralklassifikatschoon utklamüstert, de ut negen (fröher teihn) Mineralklassen besteiht un 1941 to’n eersten mol publizeert weer. Disse „Mineralogschen Tabellen“ sünd siet de Tiet jümmer an den aktuellen Wetensstand anpasst un in mehrere Spraken översett worrn. Vundaag sünd se dat Standartwark för Mineral-Systematiker.

Tosamen mit Ramdohr harr Strunz bedüdend Andeel an de Vebetern un Utwieten vun de 16. Oplaag vun Klockmanns Lehrbook vun de Mineralogie (ISBN 3-432-82986-8). Strunz hett tohopen veerteihn ne’e Mineraloorden opdeckt, as t. B. Laueit, Hagendorfit, Chudobait, Fleischerit, Stranskiit, Liandradit, Petscheckit.

Utteken

Hugo Strunz hett 1985 dat Bundsverdeenstkrüüz eerster Klass kregen. He weer Ehrenliddmaat vun mehr as twintig natschonale un internatschonale wetenschoppliche Sellschoppen un Akademien. Siet 1995 weer he Ehrenliddmaat vun de Münchener Mineralfrünnen e.V. Na em sünd de Mineralen Strunzit un Ferrostrunzit nöömt.

Kiek ok

• Systematik vun de Mineralen

Literatur

Arno Mücke: In Memoriam Prof. Hugo Strunz. In: Der Aufschluss 57/2006/Utg. 4, S. 193-194, ISSN 0004-7856

Weblenken

• TU Berlin - Hugo Strunz, Biografie
• Frünnen vun de Mineralogie un Geologie Weiden - Naroop för Hugo Strunz (hoochdüütsch)
• Düütsch Sellschap för Kristallographie e.V. - Naroop Prof. Dr. Dr. Hugo Strunz (PDF, S. 64, 3,2 MB, hoochdüütsch)