Katja Oldenburg-Schmidt

Katja Oldenburg-Schmidt (* 1959) is en düütsche Verwaltungsbeamtin.

Oldenburg-Schmidt is 1959 in’n Kreis Pinnbarg boren un dor ok opwussen. Ehr Abitur hett se an dat Gymnasium in Pinnbarg maakt. Se hett an de Universitäten Hamborg un Freiburg Juristeree studeert un weer ok wetenschopliche Mitarbeiderin an’n Lehrstohl för Finanzwetenschop in Hamborg. Na dat Studium hett se in de Ümweltbehörde von de Stadt Hamborg arbeidt. 1992 is se in de Stadt Buxthu kamen un hett dor de Ressorts Recht un Ordnung övernahmen. Von 1994 af an weer se Geschäftsföhrerin von de Sellschop, de de Grundstücken von de Estetal-Kasern vermarkten dee. 2000 hett se dat Leid von’n Präventschoonsraad von de Stadt Buxthu övernahmen. 2009 hett de Stadtraad ehr as eerste Stadträdin wählt. Se is an’n 25. Mai 2014 mit 59,6 % von de Stimmen as parteilose Kannedatin för söven Johr as Börgermeestersche von de Stadt Buxthu wählt worrn un hett dat Amt an’n 1. November 2014 von ehren Vörgänger Jürgen Badur övernahmen. Ehr aktuelle Amtstied löppt bet to’n 31. Oktober 2021.

Oldenburg-Schmidt is verheiraadt un hett een Dochter.

Weblenken

• Websteed von Oldenburg-Schmidt (hoochdüütsch)