Konrad II. (HRR)

Konrad II. (Konrad de Öllere) (* um 990 rüm; † 4. Juni 1039 in Utrecht) weer Kaiser vun dat Hillge Röömsche Riek vun 1027 bit 1039. Al vördem weer he vun 1024 af an röömsch-düütschen König un vun 1026 af an König vun Rieksitalien ween. 1033 is he denn ok noch König vun Burgund wurrn. Konrad weer de Nafolger vun Hinrich II. ut dat Huus vun de Ottonen, de keen Kinner harrt hett. Mit em keem dat Huus vun de Saliers to'n eersten Mol up den Throon. Ín de Karkenpolitik, de Italienpolitik un bi dat, wat he sik unner en röömschen Kaiser vorstellen dö, hett he dor wieter maakt, wo sien Vorweser uphöört harr. De Positschoon vun dat Riek hett Konrad fudder utboot. Dor hett he sik bi up de Riekskarken stütten konnt. Just so, as Hinrich, hett he ok de Fingers laten vun de Angelegenheiten in Rom. To siene Tied is de Kaiserherrschop in't Middeloller up de Hööchde kamen un in dat Riek hett dat Ruh geven. He hett dat Königriek Burgund endgüllig in'e Hand kregen. Ok dor weer Hinrich al mit anfungen. As Burgund denn en Deel vun den Rieksverband wurrn weer, is de Gedanke vun de „Dreeheit“ vun de Rieke upkamen (tria regna): Dat Oostfränk’sch-düütsche, dat itaalsche un dat burgunnsche Königriek stunnen all dree unner de Regeerung vun den düütschen König un Kaiser. To siene Tied is Speyer mank de düütschen Städer upstegen as de Stadt, wo de Herrschers begraven wurrn sünd un wo dat Memorialwesen pleegt wurrn is.

Twuschen Muern sitt Konrad II. up'n Throon. In de lunke Hand hett he den Rieksappel, in de rechte en Medaillon mit dat Bostbild vun sien Söhn un Nafolger Hinrich III.. Dorunner is Hinrich IV. dorstellt un unner em siene Kinner: de Söhns Konrad III. un Hinrich V. un de Dochter Agnes, de hier verkehrt man Adelheid nömmt warrt. Staatsbibliothek Berlin, Stiftung Preußischer Kulturbesitz, Cod. lat. 295, fol. 81v (um 1130).

Vörgänger	Amt	Nafolger
Hinrich II.	Röömsch-düütschen Kaiser 1027-1039	Hinrich III.