Lüttje Lage

De Lüttje Lage warrt in Hannober un ümto veel drunken. De Lüttje Lage besteiht ut en Glas mit speziell Bavengest-Beer (dat Lüttje-Lage-Beer, 5 cl, 2,8 % Alkohol) un en kort Glas (1 cl) mit Kööm. Allens beids warrt na olen Bruuk gliektiedig drunken. Dat Beerglas warrt normal twischen Duum un Wiesfinger hollen un dat korte Glas warrt twischen Middel- un Ringfinger klemmt. Denn warrt dat Beerglas an’n Mund nahmen un allens in een Tog utdrunken. De Hand mutt dorbi so hollen warrn, dat de Kööm mit dat Beer in’n Mund löppt.

So warrt bi de Lüttje Lage de Hand hollen

Lüttje Lage richtig hollen

In Hamborg un ümto gifft dat mit Lütt un Lütt wat Ähnlichs.

Historie

Cord Broyhan schall 1526 de eerste wesen hebben, de dat spezielle Beer broot hett, dat för de hannöversche Lüttje Lage bruukt warrt. Later is denn de Bruuk opkamen, dat Beer mit Kööm in een weg to drinken. Hüdigendaags warrt de Lüttje Lage vör allen bi Festen utschunken. Bi de Schützenfesten (to’n Bispeel dat grote Schützenfest vun Hannover) oder bi dat Maschseefest. Dat Lüttje-Lage-Beer warrt vör allen an de Krögeree afgeven, so in’n Laden to köpen gifft dat dat nich.

Weblenken

Lüttje Lage. Mehr Biller, Videos oder Audiodateien to’t Thema gifft dat bi Wikimedia Commons.

• Lüttje-Lage-Anleitung in mehr as 25 Spraken - ok op platt (hoochdüütsch)