Filmdaten
Plattdüütsch Titel:
Originaltitel: Last Ride
Düütsch Titel: Last Ride – Manche Fesseln können gelöst werden
Produkschoonsland: Australien
Johr vun’t Rutkamen: 2009
Läng: 90 Minuten
Originalspraak: Engelsch
Öllersfreegaav in Düütschland: FSK 12
Filmkru
Speelbaas: Glendyn Ivin
Dreihbook: Mac Gudgeon
Produkschoon: Nicholas Cole
Antonia Barnard
Musik: Paul Charlier
Kamera: Greig Fraser
Snitt: Jack Hutchings
Szenenbild: Josephine Ford
Kledaasch: Jodie Fried
Dorstellers

Last Ride (op plattdüütsch so veel as „Letzte Fohrt“; dt. Titel: Last Ride – Manche Fesseln können gelöst werden) is de Titel vun en austraalsch Filmdrama ut dat Johr 2009. Dat weer de eerste Film vun den Speelbaas Glendyn Ivin, de Hööftrullen weern besett mit Hugo Weaving un den Nawassschauspeler Tom Russel, de in den Film Vadder un Söhn dorstellt. De Inholt baseert op den Roman Last Ride vun Denise Young.

Inholt ännern

De Film fangt dormit an, dat de junge Chook mit sien Vadder Kev an en Tanksteed kummt, woneem sik Kev de Hoor afsnieden deit. Dat Auto lett Kev kort later op en verlaten Grundstück stahn un schrufft de Kenntekens af. Na en Nacht ünner fre’en Himmel besöölt se Kev sien fröhere Bruut Maryanne, de bang is, dat Kev ehr Arger maken deit. Man se gifft Verlööf, dat se wat eten un sik waschen künnt. Kev un Maryanne hebbt sogor Sex, man ünenr de Bedingen, dat he dorna wedder verswinnen deit. Chook warrt vun Maryanne gewohr, woans se un Kev sik kennen lehrt hebbt. Dat weer in en Gefängnis, woneem Kev en Straaf afseten hett. Se fraagt na de Telefonnummer vun Max, mit den se un Kev fröher tohopen leevt hebbt. Chook fraagt er dorophen, wat se Max anropen künn, üm to höörn, dat em dat goot geiht. He sülvst harr dat al versöcht, is vun sien Vadder aver ünnerbroken worrn. Opletzt reist de beiden wieter, un Kev seggt to Maryanne, dat se nümms vertellen schall, dat se bi ehr weern.

Doran breekt si in en lütt verlaten Museum in. Dor fraagt Chook wedder na Max un worüm Kev em slahn harr, man sien Vadder meent blots, dat dat Max goot gahn deit. He lett sien Söhn torüch, üm in den nächsten Oort intoköpen. In’t Feernsehn sütt he en Bericht över en Moord, lannt opletzt aver in en Bar, woneem he in en Haueree verwickelt warrt. Den nächsten Morgen kummt en Fro in’t Museum, en Doktersche, as sik rutstellt. Wedder fraagt Chook, wat se Max besöken künn, üm em to hülpen. Man, as Kev dorto kummt, fesselt he ehr un roovt butendem ehr Auto. As nächst kamt se in en Natschonalpark ünner, woneem se vun en Ranger opdeckt warrt. Kev kann em betütern, dat se een Nacht in’n Park blieven drööft. In’t Auto finnt Chook Schminksaken vun de Doktersche un schminkt sik dormit. Man, as Kev dat den nächsten Morgen sütt, sleiht he den Jungen mehrmols mit’n Gördel, vunwegen dat he utsütt as’n Deern un he sik waschen schall. Kort later is he wedder fründlich to sien Söhn un maakt en Anfang em dat Swemmen bitobringen. As se torüch na jemehrn Lagerplatz kamt, hett de Polizei dat Auto opdeckt. Kev roovt op en Campingplatz dicht bi en anner’t Auto un föhrt mit Chook wedder los.

 
An’n Lake Gairdner speelt de Szenen vun’n Soltsee

An en Soltsee denkt Chook wedder torüch an de letzte nacht bi Max, as de sik to em in’t Bett leggt hett un dorophen vun Kev tosamenslahn weer. He snackt sien Vadder dorop an, de em vetellt, dat Max doot is. Chook warrt dull un haut nu op sien Vadder in, de em utsetten deit un alleen wieter föhrt. As he torüch kummt, will Chook nich wedder in dat Auto instiegen. He geiht tofoot bit an’t Över wieter. Jümmer fakener kummt dat to’n Striet twüschen de beiden. Dor bringt Kev en Gewehr un en poor Levensmiddel in sien Besitt, vördem se in de Neeg vun’n See wedder lagern doot.

Chook maakt sik grote Sorgen wegen jemehr Laag un föhlt sik hen- un herreten mit sien Geföhlen. He versöcht sik vun sien Vadder lostolösen. Ünner den Vörwand, Füürholt to halen geiht Chook weg vun’t Lager un schickt mit en Mobiltelefon en Foto vun jemehrn Standoort an de Polizei. Kev maakt sik opletzt op de Söök na sien Jungen, fallt dorbi aver hen un besehrt sik. As Kev nu nich mehr lopen kann schütt de Jung mit dat Gewehr op de Reifen vun dat Auto un verstickt sik wedder in de Neeg vun’t Lager. Den annern Morgen duukt Polizeiautos op. Chook geiht torüch na sien Vadder, de em opdriggt, bi de Polizei na Maryanne to fragen. As Chook em vertellt, dat he dat weer, de de Polizei herföhrt hett, seggt Kev em, dat he dat richtige doon hett un schickt em denn weg. Dat Gewehr lett Chook bi sien Vadder, de sik dormit sülvst ümbringt. Chook sütt sien do’en Vadder un löpt op en See to, woneem he sik in’t Water störten deit un drauht ünner to gahn, bit he sik drieven lett, so as sien Vadder em dat bibröcht hett.

Kritiken ännern

  • In de austraalschen Feernsehsendung At the Movies vun de Filmkritikers Margaret Pomeranz un David Stratton weer de Film mit 4 un 4,5 vun 5 möögliche Steerns beweert.[1]
  • Dat Lexikon vun’n internatschonalen Film meen, dat sik dat üm en Familiendrama hannel, dat intensiv speelt weer un övertügen de. In meditative Form warrt de Vörgang vun Annegern vun twee bannig ünnerscheedliche Minschen beschreven.[2]
  • Cinema.de loov dat Speel vun de beiden Hööftdorstellers, kritiseer aver, dat jemehr innehmen Dorstellen de eenzige Stärk vun den Film weer, de den Bestseller vun Denise Young in de Läng tehn de.[3]

Utteken ännern

De Film weer för tosamen för acht Filmpriesen vörslahn, uttekent weer he blots eenmol, neemlich 2009 mit den Jury-Pries vun’t Rome International Film Festival.

Produkschoon ännern

 
Hugo Weaving speel de Hööftrull

De Produkschoon vun Last Ride füng an’n 16. Juni 2008 an, de Dreiharbeiten güngen anvn 21. Juli 2008 los un hebbt bit to’n 30. August dat glieke Johr duert.[4] De helen Dreiharbeiten sünd in Australien maakt worrn, wobi vör allen in South Australia dreiht worrn is. To de Dreihöörd tellt Port Wakefield, Port Gawler, Port Augusta, Quorn, Leigh Creek un Pimba as ok de Flinders Ranges. Bito sünd Opnahmen an de Felsformatschoon Wilpena Pound maakt worrn un an’n Lake Gairdner, de as de drüttgröttste Soltsee vun Australien gellt.

De Filmprodukschoon weer ünnerstütt vun de South Australian Film Corporation, de staatliche Fördersellschopp Film Victoria, Screen Australia un dat Adelaide Film Festival[5]. Verdreven weer de Film in Australien vun Madman Entertainment, in de USA vun Music Box Films un in Düütschland dör Dtp entertainment[6]. Premiere vun Last Ride weer an’n 7. Juni 2009 op’t Sydney Film Festival. In de austraalschen Kinos keem he an’n 2. Juli 2009. In annere Länner is de Film nich in de Kinos kamen, lööp aver op verschedene Filmfestivals, so as op dat Toronto, dat Pusan un dat Palm Springs International Film Festival. In Düütschland is de Film an’n 26. Mai 2011 op DVD rutkamen, an’n 1. September ok op Blue-ray Disc.

Borns ännern

  1. Last Ride review. At the Movies (Transkript)
  2. Filmkritik in’t Lexikon vun’n internatschonalen Film; afropen an’n 25. Januar 2015
  3. Last Ride auf Cinema.de
  4. Box office / business for Last Ride in de Internet Movie Database
  5. In’n Afspann vun’n Film optellt
  6. Company credits for Last Ride in de Internet Movie Database

Weblenken ännern