Lawless Range

Filmdaten
Plattdüütsch Titel:	—
Originaltitel:	Lawless Range
Düütsch Titel:	Tal der Angst
Produkschoonsland:	USA
Johr vun’t Rutkamen:	1935
Läng:	53 Minuten
Originalspraak:	Engelsch
Filmkru
Speelbaas:	Robert N. Bradbury
Dreihbook:	Lindsley Parsons
Produkschoon:	Paul Malvern
Kamera:	Archie Stout
Snitt:	Carl Pierson
Dorstellers
John Wayne: John Middleton Sheila Mannors: Ann Mason Frank McGlynn Jr.: Frank Carter Jack Curtis: Marshal Wally Howe: Hank Mason Julia Griffith: Marie Mason Yakima Canutt: Joe Bruns / Butch Martin Earl Dwire: Mr. Emmett

Lawless Range (op plattdüütsch so veel as „Land ahn Gesett“; dt. Titel: Tal der Angst oder Highnoon in Helltown) is de Titel vun en US-amerikaanschen B-Western ut dat Johr 1935 mit John Wayne in de Hööftrull. Dreiht worrn is de Film an verscheden Öörd in’n US-Bundsstaat Kalifornien. De Premiere harr he an’n 6. Juli 1936 in de USA.

Inholt

De Farmerjung John Middleton warrt vun sien Vadder losschickt, üm na den sien besten Fründ Hank Mason to kieken. De hett neemlich en Breef schreven, dat he Maleschen harr. Op’n Weg kummt he bi en Överfall twüschen de Fronten. De Marshal nimmt em to’n Schien fast, vunwegen dat he em as Spion anhüern will. He schall so doon, as weer he ut dat Gefängnis utbroken, üm Kuntakt to en Röverbande opnehmen to künnen. In de Stadt, in de he schickt warrt, is ok Hank Mason verswunnen, so dat John den Opdrag geern annehmen deit. Noch vördem he in de Stadt ankamen is, dröpt he op de Banditen un dat kummt to en Scheeteree. John sorgt dorför, dat en junge Fro wegrieden kann un hollt de Rövers op. Later stellt sik rut, dat de Fro de Nicht vun Mason is.

Mit sien Singen un sien Gitarr kriggt de Cowboy de junge Fro gau rüm. Ann hett den inflootrieken Frank Carter in Verdacht, dat he wat mit de Bande üm Butch Martin un ok mit dar Verswinnen vun ehr Unkeln to doon hett. Den annern Dag warrt John gewohr, dat de Bande woll vörhett de Farmers in de Stadt uttohungern un so ut dat Daal to verdrieven. John beedt dorüm an, en Wagentrek mit Levensmiddel dörtobringen. He stellt dormit en Fall för de Banditen un hett dormit Spood. Denn aver kummt de Steekbreef vun’n Marshal in de lütte Stadt – jüst so, as dat afsnackt weer – un stellt John as Verbreker dor. Man, ok de Banditen kriegt en Henwies, dat John in Wohrheit för’t Gesett arbeiten deit. Se finnt en Vörwand, em in jemehr Versteek to locken un sparrt em weg. Dor in’t Versteek finnt John ok Hank Mason, de jüst so vun de Bande insparrt weer. Man, tosamen künnt se sik befre’en.

Foorts maakt sik John op’n Weg, üm den Marshal Bescheed to seggen, dat de ‚Martin-Gang‘ vörhett, de Veehdrift vun de Farmerslüüd to överfallen. Dormit gifft sik en Mööglichkeit, de hele Bande op een Slag to faat to kriegen. Wohrhaftig griept de Banditen de Buerslüüd an, wobi de Farmers kuum wat uttorichten hebbt. Man, dat Blatt wennt sik, as John mit den Marshal un den sien Lüüd to Hülp kummt. So flüggt Carter an’t Enn as de Verantwoortliche achter all de Gewalt vun de Bande op. He wull dorför sorgen, dat de Farmers verdreven warrt, vunwegen dat he alleen de Besitter vun dat Land in’t Daal warrn wull, nadem Hank Mason op sien Land en Goldmien opdeckt hett.

Weblenken

• Lawless Range in de Internet Movie Database (engelsch)