Lawrence Adam

Lawrence „Law“ Adam (* 11. Juni 1908 in Probolinggo, Nedderlannsch-Indien; † 15. Mai 1941 in Surabaya, Nedderlannsch-Indien) weer en nedderlannsch Footballspeler, de ok en Lännerspeel för de Swiez maakt hett.

Adam hull sück Enn‘ vun de 1920er Johren as Student vun de Ingenieurwetenschapen in de Swiez up un speel dor bi Grasshopper Zürich. Sien eerst Lännerspeel hett he för de Swiez an‘ 27. Oktober 1929 bi dat Lännerspeel in Bern gegen de Mannschap ut Öösterriek maakt. As een Johr later de Nedderlannen in Zürich to en Lännerspeel gegen de Swiez antreeden dee, hett man Adam inlaaden, in de Oranje-Elf to spelen. De Partie gung för de Nedderlänner mit 3:6 verloren.

In de Loop vun sien Karriere hett Adam, de as Störmer speel (Rechtsbuten), tüschen November 1930 un Mai 1933 elf Mal för de Nedderlannsch Natschonalmannschap speelt un dorbi söss Doren schaaten. Sien gröttste Erfolg weer dorbi de 2:0-Sieg gegen de Mannschap ut Düütschland in‘ Dezember 1932 in Düsseldörp, bi de he beid Doren schaaten hett.

In dat Fröhjohr 1933 is Adam in de Nedderlannen översiedelt un hett sück den HVV Den Haag anslooten. Aber all en lütt Sett later muss he sien sportlich Loopbahn wegen Hartbeschwerden afsluuten. Sluutend is he all mit 32 Johren 1941 wiels en Footballspeel in Nedderlannsch-Indien an en Hartstillstand storven.

WeblenkenÄnnern